Reliance Jio च्या JioCoin बद्दल सध्या बाजारात मोठी उत्सुकता आहे. ब्लॉकचेन-आधारित हे डिजिटल टोकन Jio इकोसिस्टमच्या वापरकर्त्यांना फायदे देण्यासाठी डिझाइन केले गेले आहे. सध्या JioSphere ब्राउझरच्या माध्यमातून JioCoins मिळवता येत आहेत. JioSphere वापरणाऱ्या ग्राहकांना आता JioCoins नावाचे नवीन फीचर दिसू लागले आहे, त्यामुळे त्याबाबत अधिक माहिती जाणून घेण्याची इच्छा अनेकांना आहे.
JioCoin म्हणजे काय?
JioCoin हा डिजिटल टोकन असून, तो Web3 तंत्रज्ञानावर आधारित असल्याचे बोलले जात आहे. हा कॉईन वापरून Jio प्लॅटफॉर्मवरील विविध सेवांसाठी पेमेंट करता येईल. उदाहरणार्थ, मोबाईल रिचार्ज, रिलायन्स गॅस स्टेशनवर इंधन भरणे आणि विविध Jio सेवांसाठी वापर करता येऊ शकतो. जितके जास्त युजर्स हे टोकन वापरतील, तितकी त्याची मागणी वाढण्याची शक्यता आहे. तसेच, JioCoin Web3 वॉलेटमध्ये साठवता येईल, जिथे युजर्स त्याचा वापर विविध ऑफर्ससाठी करू शकतील.
Reliance Jio आणि Polygon Labs ची भागीदारी
Jio ने Polygon च्या सहकार्याने Web3 तंत्रज्ञानावर आधारित JioCoin कार्यक्रम सुरू करण्याची तयारी केली आहे. मात्र, हा कॉईन खरोखर क्रिप्टोकरन्सीसारखा व्यवहार करेल की फक्त Jio इकोसिस्टमपुरता मर्यादित असेल, याबाबत अजून स्पष्टता आलेली नाही.
JioCoin खरेदी करता येईल का?
रिपोर्ट्सनुसार, Reliance Jio लवकरच MyJio, Jio Cinema आणि JioMart सारख्या प्लॅटफॉर्मवर JioCoins टोकन सिस्टम सुरू करण्याची योजना आखत आहे. येथे वापरकर्त्यांना विविध क्रियाकलापांद्वारे हे टोकन्स मिळवता येतील. मात्र, JioCoins सध्या थेट खरेदीसाठी किंवा कोणत्याही क्रिप्टो एक्स्चेंजवर ट्रेडिंगसाठी उपलब्ध नाहीत. याचा अर्थ असा की हे फक्त Jio सेवांचा वापर करून कमावता येतील आणि Jio इकोसिस्टममध्येच वापरले जाऊ शकतील.
Bitcoin प्रमाणे कमाई शक्य ?
JioCoin बद्दल एक महत्त्वाचा प्रश्न विचारला जात आहे की यातून क्रिप्टोकरन्सीप्रमाणे मोठे पैसे कमावता येतील का? सध्या Reliance Jio ने या संदर्भात कोणताही अधिकृत तपशील शेअर केलेला नाही. त्यामुळे याचा अंदाज बांधणे कठीण आहे. JioCoin जर भविष्यात स्वतंत्र क्रिप्टोकरन्सी म्हणून स्वीकारला गेला, तर त्याच्या किंमतीत मोठी वाढ होण्याची शक्यता नाकारता येत नाही.
JioCoin आणि Bitcoin फरक
हे लक्षात घेणे महत्त्वाचे आहे की JioCoin ही पारंपारिक क्रिप्टोकरन्सी नाही. Bitcoin हे पूर्णपणे स्वतंत्र डिजिटल चलन आहे, ज्यावर कोणत्याही सरकारचे नियंत्रण नाही. मात्र, JioCoin हे फक्त Jio इकोसिस्टममध्ये वापरण्यासाठी तयार करण्यात आलेले टोकन आहे. त्यामुळे याचा उपयोग केवळ Jio सेवांसाठी केला जाऊ शकतो.
Bitcoin च्या किंमतीत वाढ
Bitcoin चे उदाहरण पाहता, 2010 मध्ये एका बिटकॉइनची किंमत फक्त ₹2.85 होती आणि आज त्याची किंमत ₹88 लाखांवर पोहोचली आहे. याचा अर्थ असा की जर JioCoin ला भविष्यात मोठी मागणी निर्माण झाली, तर त्याच्या किंमतीतही मोठी वाढ होऊ शकते.
किंमत भविष्यात किती
सध्या JioCoin च्या संभाव्य किंमतीबाबत कोणतीही ठोस माहिती नाही, मात्र मीडिया रिपोर्ट्सनुसार, JioCoin ची प्रारंभिक किंमत अंदाजे ₹43 ($0.50) असू शकते. भविष्यात JioCoin बिटकॉइन प्रमाणे मुख्य प्रवाहात आल्यास, त्याच्या किंमतीत exponential वाढ होऊ शकते.
तुम्ही श्रीमंत होऊ शकता ?
आता विचार करा, जर तुम्हाला आज JioCoin फ्रीमध्ये मिळत असेल आणि भविष्यात त्याची किंमत लाखोंमध्ये गेली तर? तज्ज्ञांचा अंदाज आहे की JioCoin ला मोठ्या प्रमाणात स्वीकारले गेले तर त्याची किंमत 90 लाखांपर्यंत पोहोचू शकते. परिणामी, लवकर गुंतवणूक करणारे लक्षाधीश बनण्याची संधी मिळवू शकतात.
Bitcoin ला टक्कर देईल का ?
JioCoin खरोखरच Bitcoin सारखा व्यवहार करू शकेल का, हे सध्या सांगता येत नाही. कारण यामागे Reliance Jio चा उद्देश ग्राहकांना सेवांमध्ये गुंतवून ठेवणे आहे, त्याऐवजी पूर्णपणे स्वतंत्र क्रिप्टोकरन्सी तयार करणे नाही. मात्र, याला भविष्यात मोठा प्रतिसाद मिळाल्यास, JioCoin बिटकॉइनच्या मार्गावर जाऊ शकतो.
गुंतवणुकीसाठी योग्य पर्याय ?
सध्या JioCoin खरेदी किंवा ट्रेडिंगसाठी उपलब्ध नाही, त्यामुळे त्याचा गुंतवणुकीसाठी विचार करणे योग्य नाही. परंतु, भविष्यात Reliance Jio ने याबाबत अधिकृत घोषणा केल्यास, गुंतवणूकदारांसाठी हा मोठा संधीचा पर्याय ठरू शकतो. त्यामुळे याबाबतच्या सर्व अपडेट्सकडे लक्ष ठेवणे महत्त्वाचे ठरेल.
क्रिप्टोकरन्सी नियम
JioCoin अशा वेळी चर्चेत आहे, जेव्हा भारत सरकार क्रिप्टोकरन्सीबाबत कडक नियम आखण्याच्या तयारीत आहे. देशात क्रिप्टोकरन्सी व्यवहारांवर मोठ्या प्रमाणात कर आकारला जात आहे, त्यामुळे अनेक भारतीय गुंतवणूकदारांसाठी क्रिप्टो करन्सीमध्ये गुंतवणूक करणे आव्हानात्मक ठरले आहे. JioCoin च्या अधिकृत घोषणेकडे सर्वांचे लक्ष लागले आहे. हा क्रिप्टोकरन्सीचा भारतीय पर्याय ठरेल की केवळ Jio सेवांसाठी वापरण्यात येईल? हे येत्या काळात स्पष्ट होईल.
