Cholesterol Effect:- आजच्या धावपळीच्या जीवनशैलीमुळे आणि चुकीच्या आहाराच्या सवयींमुळे अनेक लोक विविध प्रकारच्या गंभीर आजारांना बळी पडत आहेत. त्यापैकी एक मोठी समस्या म्हणजे उच्च कोलेस्ट्रॉल ही होय.शरीरात कोलेस्ट्रॉलचे दोन प्रकार असतात – एक चांगले कोलेस्ट्रॉल आणि दुसरे वाईट कोलेस्ट्रॉल.
चांगले कोलेस्ट्रॉल शरीरासाठी उपयुक्त असून ते हृदयाच्या आरोग्यास मदत करते. मात्र वाईट कोलेस्ट्रॉल जास्त प्रमाणात वाढल्यास रक्तवाहिन्यांमध्ये अडथळे निर्माण होऊ शकतात आणि त्यामुळे हृदयविकारासारखे गंभीर आजार उद्भवू शकतात.
कोलेस्ट्रॉल म्हणजे काय?
कोलेस्ट्रॉल हा एक मेणासारखा पदार्थ आहे जो शरीराच्या पेशींमध्ये आढळतो. तो लिव्हरद्वारे तयार केला जातो. तसेच काही अन्नपदार्थांमधूनही शरीरात प्रवेश करतो. शरीराला कोलेस्ट्रॉल आवश्यक असते.कारण तो सेल मेम्ब्रेन तयार करण्यात आणि काही जीवनसत्त्वांच्या निर्मितीमध्ये मदत करतो. मात्र जर शरीरात कोलेस्ट्रॉलचे प्रमाण नियंत्रणाबाहेर गेले तर ते धोकादायक ठरू शकते.
कोलेस्ट्रॉल वाढल्याने होणारे दुष्परिणाम
हृदयविकाराचा धोका वाढतो
कोलेस्ट्रॉल वाढल्यास रक्तवाहिन्यांमध्ये प्लेक (म्हणजे चरबीचा थर) तयार होतो, ज्यामुळे रक्ताभिसरणावर परिणाम होतो. परिणामी, हृदयाला पुरेसा ऑक्सिजन आणि रक्त मिळत नाही, ज्यामुळे हार्ट ब्लॉकेज किंवा हृदयविकाराचा झटका येण्याचा धोका वाढतो.
रक्तवाहिन्या अरुंद होणे
उच्च कोलेस्ट्रॉलमुळे धमन्यांमध्ये चरबी साठते, ज्यामुळे त्या आकसतात आणि कठीण होतात. ही स्थिती एथेरोस्क्लेरोसिस म्हणून ओळखली जाते आणि त्यामुळे हृदयविकार, उच्च रक्तदाब आणि स्ट्रोकचा धोका वाढतो.
हृदयाचे ठोके अनियमित होणे
कोलेस्ट्रॉल वाढल्यामुळे हृदयाच्या कार्यावर परिणाम होतो. रक्तवाहिन्या अरुंद झाल्यामुळे ऑक्सिजनचा पुरवठा कमी होतो आणि हृदय अधिक दडपणाखाली येते. यामुळे हृदयाचे ठोके अनियमित होण्याची शक्यता असते.
किडनीच्या कार्यावर परिणाम
उच्च कोलेस्ट्रॉलमुळे किडनीच्या रक्तवाहिन्यांमध्ये अडथळे निर्माण होतात, ज्यामुळे रक्ताभिसरण नीट होत नाही आणि किडनीच्या कार्यावर परिणाम होतो. यामुळे किडनीच्या आजारांचा धोका वाढतो.
छातीत दुखणे
जर कोलेस्ट्रॉलचे प्रमाण जास्त असेल तर छातीत दुखणे किंवा जडपणा जाणवू शकतो. रक्तवाहिन्या अरुंद झाल्यामुळे हृदयाला पुरेसा रक्तपुरवठा होत नाही आणि त्यामुळे एनजाइना होऊ शकतो.
कोलेस्ट्रॉल कमी करण्यासाठी घरगुती उपाय
अंबाडीच्या बियांचे सेवन
अंबाडीच्या बिया (Flaxseeds) शरीरातील वाईट कोलेस्ट्रॉल कमी करण्यास मदत करतात. यामध्ये ओमेगा-३ फॅटी ॲसिड्स असतात.जे हृदयासाठी फायदेशीर असतात. रोज सकाळी एक ग्लास कोमट पाणी किंवा दूधात एक चमचा अंबाडीच्या बिया मिसळून पिल्यास कोलेस्ट्रॉल नियंत्रित राहते.
लसणाचा वापर
लसणामध्ये अँटीऑक्सिडंट्स आणि सल्फर कंपाउंड्स असतात जे कोलेस्ट्रॉल नियंत्रित ठेवण्यासाठी मदत करतात. रोज सकाळी आणि रात्री झोपण्यापूर्वी २-३ कच्च्या लसूण पाकळ्या खाल्ल्यास हृदयाचे आरोग्य सुधारते.
फायबरयुक्त आहार घ्या
ओट्स, बार्ली, सफरचंद, बीट आणि गाजर यांसारखे फायबरयुक्त पदार्थ कोलेस्ट्रॉल कमी करण्यास मदत करतात. हे पदार्थ रक्तवाहिन्यांमधील चरबी हटवून रक्ताभिसरण सुधारतात.
बदाम आणि अक्रोड खा
बदाम आणि अक्रोड यांमध्ये हेल्दी फॅट्स आणि अँटीऑक्सिडंट्स असतात.जे हृदयाच्या आरोग्यास मदत करतात आणि कोलेस्ट्रॉल नियंत्रित ठेवतात.
ग्रीन टी प्या
ग्रीन टी मधील अँटीऑक्सिडंट्स शरीरातील अतिरिक्त चरबी कमी करण्यास मदत करतात आणि कोलेस्ट्रॉलची पातळी संतुलित ठेवतात. दररोज २ कप ग्रीन टी प्यायल्यास हृदयाचे आरोग्य सुधारते.
नियमित व्यायाम करा
दररोज किमान ३० मिनिटे चालणे, जॉगिंग किंवा योगासने केल्याने शरीरातील वाईट कोलेस्ट्रॉलचे प्रमाण कमी होते आणि चांगल्या कोलेस्ट्रॉलचे प्रमाण वाढते.
