कर्मचारी भविष्य निर्वाह निधी संघटनेतर्फे (EPFO) सदस्यांसाठी महत्त्वाची घोषणा करण्यात आली आहे. EPFO ने युनिव्हर्सल अकाउंट नंबर (UAN) सक्रिय करण्यासाठी आणि बँक खाते आधारशी लिंक करण्यासाठी मुदतवाढ दिली आहे. आता नोकरदारांना हे आवश्यक काम १५ मार्च २०२५ पर्यंत पूर्ण करण्याची संधी मिळणार आहे. UAN सक्रिय केल्याने EPFO च्या सर्व ऑनलाइन सेवांचा सहज उपयोग करता येईल.
EPFO च्या निर्णयाचा कर्मचारी वर्गावर परिणाम
EPFO ने आपल्या अधिकृत सोशल मीडिया प्लॅटफॉर्मवरून ही महत्त्वाची माहिती जाहीर केली आहे.यापूर्वी UAN सक्रिय करण्याची आणि आधार सीडिंगची अंतिम तारीख १५ फेब्रुवारी २०२५ होती, मात्र ती १५ मार्च २०२५ पर्यंत वाढवण्यात आली आहे.या मुदतवाढीमुळे हजारो कर्मचारी आता अधिक सोयीस्करपणे त्यांचे खाते अपडेट करू शकतात. EPFO च्या विविध योजनांचा लाभ घेण्यासाठी UAN सक्रिय करणे अनिवार्य असल्याचेही सांगण्यात आले आहे.
UAN सक्रिय करणे का आवश्यक आहे ?
युनिव्हर्सल अकाउंट नंबर (UAN) हा १२ अंकी क्रमांक असतो आणि तो प्रत्येक कर्मचारीच्या पीएफ खात्याशी जोडलेला असतो. UAN सक्रिय केल्याने खालील गोष्टी सहजपणे करता येतात:
EPFO च्या सर्व ऑनलाइन सेवांचा वापर – कर्मचारी त्यांचे पीएफ खाते ऑनलाइन पाहू शकतात.
पासबुक डाऊनलोड आणि बॅलन्स तपासणी – यामुळे खात्यात जमा झालेल्या रकमेचा मागोवा ठेवता येतो.
पीएफ निधी काढणे किंवा ट्रान्सफर करणे – ऑनलाइन अर्जाद्वारे हे काम सोपे होते.
बँक खाते आणि आधारशी लिंकिंग करणे – याद्वारे खात्याशी संबंधित कोणतेही बदल सहज करता येतात.
UAN सक्रिय करण्याची प्रक्रिया
UAN सक्रिय करणे अगदी सोपे आहे आणि ते EPFO च्या अधिकृत वेबसाइटवरून करता येते. खालील चरणांद्वारे तुम्ही UAN सक्रिय करू शकता:
EPFO च्या अधिकृत वेबसाइट epfindia.gov.in ला भेट द्या.
सर्व्हिसेस सेक्शनमधील “For Employees” वर क्लिक करा.
नव्या पेजवर “Activate UAN” या पर्यायावर क्लिक करा.
१२ अंकी UAN क्रमांक, आधार क्रमांक, नाव, जन्मतारीख आणि मोबाईल नंबर प्रविष्ट करा.
डिक्लेरेशन फॉर्म स्वीकारून “Get Authorization Pin” वर क्लिक करा.
मोबाईलवर आलेला OTP प्रविष्ट करून प्रक्रिया पूर्ण करा.
तुमच्या मोबाइल नंबरवर एक पासवर्ड येईल, तो वापरून UAN लॉगिन करा.
EPFO सदस्यांसाठी UAN सक्रिय करणे अत्यंत महत्त्वाचे आहे. या सुविधेमुळे कर्मचारी त्यांच्या पीएफ खात्याची माहिती सहज पाहू शकतात आणि पीएफ ट्रान्सफर किंवा काढण्याच्या प्रक्रियेत कोणतीही अडचण येत नाही. १५ मार्च २०२५ ही अंतिम मुदत असल्यामुळे नोकरदारांनी लवकरात लवकर UAN सक्रिय करून EPFO च्या सर्व सेवांचा लाभ घ्यावा.
