MS Dhoni News : IPL 2025 जवळ येत असताना, क्रिकेट विश्वात एक नाव पुन्हा चर्चेत आले आहे – महेंद्रसिंग धोनी. माजी भारतीय कर्णधार आणि चेन्नई सुपर किंग्जचा अनुभवी खेळाडू एम. एस. धोनी आपल्या शांत आणि स्थिर स्वभावासाठी प्रसिद्ध आहे. मैदानावरचा त्याचा आत्मविश्वास आणि तणावमुक्त खेळ पाहून त्याचे चाहते नेहमीच प्रभावित होतात. पण धोनीच्या या शांत स्वभावाचे रहस्य काय? नुकत्याच एका कार्यक्रमात त्याने त्याचा जीवनमंत्र उघड केला.
माफ करा आणि पुढे जा!
धोनी म्हणतो, “लोक काहीतरी म्हणतील, ते सांगणे लोकांचे काम आहे. पण त्याकडे दुर्लक्ष करा, माफ करा आणि पुढे जा.” हा दृष्टिकोन आयुष्यात यशस्वी होण्यासाठी किती महत्त्वाचा आहे, हे त्याने आपल्या अनुभवातून सांगितले. अनेक वर्षांपासून त्याच्यावर टीका होत राहिली – कधी त्याच्या कर्णधारपदावरून, कधी संघातील निवडींबद्दल, तर कधी वैयक्तिक आयुष्याबद्दल. पण धोनीने कधीही कोणत्याही टीकेला प्रतिउत्तर दिले नाही.
साधेपणात मोठेपण आहे!
एका अलीकडील कार्यक्रमात धोनी त्याच्या खास अॅपच्या लाँचिंगदरम्यान बोलत होता. त्याने स्पष्टपणे सांगितले की तो आयुष्य साध्या पद्धतीने जगण्यावर विश्वास ठेवतो. त्याच्या मते, “स्वतःशी प्रामाणिक राहा, लोकांनी तुमच्यासाठी जे काही केले आहे त्याबद्दल कृतज्ञता बाळगा. अधिकाधिक मागण्याऐवजी, जे मिळाले आहे त्यात आनंद मानणे महत्त्वाचे आहे.”
हास्याने तणाव दूर होतो
धोनीच्या मते, चेहऱ्यावर हास्य असेल तर अर्ध्या समस्या आपोआप दूर होतात. तो पुढे म्हणतो, “सगळ्यांनाच आयुष्यात तणाव असतो. पण तुम्ही त्याला कसा सामोरे जाता, हे जास्त महत्त्वाचे आहे. परिस्थिती कठीण असली तरीही सकारात्मक दृष्टीकोन ठेवा आणि शक्य तितक्या आनंदी राहा.”
माझ्या बद्दल लोक काय विचार करतात, याची मला चिंता नाही
धोनीची आणखी एक महत्त्वाची शिकवण म्हणजे स्वतःला मानसिकदृष्ट्या मजबूत ठेवणे. तो म्हणतो, “मी माझ्या आयुष्याचा वेळ इतर लोक माझ्याबद्दल काय विचार करतात, याची काळजी करण्यासाठी वाया घालवत नाही. लोक काहीही म्हणतील, पण मला माहित आहे की मी कोण आहे आणि मी काय करतो.”
धोनीचा मौल्यवान सल्ला
क्रिकेट कारकिर्दीत धोनीला अनेकदा टीका झेलावी लागली. काही माजी खेळाडूंनी त्याच्यावर पक्षपाताचा आरोप केला, काहींनी त्याच्या खेळाच्या शैलीवर प्रश्नचिन्ह उपस्थित केले. पण त्याने कधीही कोणालाही उत्तर दिले नाही. तो फक्त एवढेच सांगतो – “आपण खूप सूड घेणारे लोक झालो आहोत. काही गोष्टी सोडून द्या, लोकांना माफ करा आणि आनंदी राहा.”
तणाव घेण्याऐवजी, गोष्टी सोडून द्या!
धोनीच्या मते, सर्वांनाच काही ना काही चिंता असतात, पण त्या कशा हाताळायच्या हे आपल्यावर अवलंबून आहे. तो म्हणतो, “आपल्या नियंत्रणाबाहेर असलेल्या गोष्टींबाबत चिंता करून काहीही साध्य होत नाही. म्हणून काहीवेळा थोडे निश्चिंत राहणे आवश्यक असते.”
