Hidden cameras in hotel : तंत्रज्ञानाच्या प्रगतीमुळे अनेक आधुनिक उपकरणे उपलब्ध झाली आहेत, जी आपल्या दैनंदिन जीवनात सोयीस्कर ठरतात. मात्र, याच तंत्रज्ञानाचा गैरवापरही मोठ्या प्रमाणात होत आहे. सार्वजनिक ठिकाणी, हॉटेल्स, एअरबीएनबी अपार्टमेंट्स किंवा भाड्याच्या घरांमध्ये काहीवेळा लोकांच्या परवानगीशिवाय गुप्त कॅमेरे बसवले जातात. विशेषतः हॉटेल्समध्ये, लपवलेले सीसीटीव्ही बल्ब किंवा इतर उपकरणे वापरून गोपनीय क्षणांची चोरी केली जाऊ शकते. त्यामुळे प्रवास करताना किंवा हॉटेलमध्ये राहण्याआधी काही महत्त्वाच्या गोष्टी तपासणे आवश्यक आहे.
हॉटेलमध्ये राहिल्यावर सर्वप्रथम काय तपासावे ?
हॉटेलच्या खोलीत प्रवेश केल्यावर, सर्वप्रथम इलेक्ट्रॉनिक उपकरणे आणि संशयास्पद गोष्टींची बारकाईने पाहणी करणे गरजेचे आहे. अनेकदा हॉटेल्समध्ये सीसीटीव्ही बल्ब, स्मार्ट घड्याळे, स्मोक डिटेक्टर, टीव्ही युनिट, वॉशरूममध्ये असणारे टिशू बॉक्स किंवा शॉवर हेड अशा ठिकाणी गुप्त कॅमेरे लपवले जातात.खोलीच्या कोपऱ्यात किंवा फर्निचरमध्ये काही अनोळखी वायर किंवा छोट्या छिद्रांवर विशेष लक्ष द्या. काही वेळा अशा लपलेल्या कॅमेरांचा वापर चुकीच्या हेतूसाठी केला जातो,त्यामुळे आपल्या सुरक्षिततेसाठी त्यांचा शोध घेणे महत्त्वाचे ठरते.
बल्बमध्ये लपलेला कॅमेरा कसा ओळखावा ?
सर्वसामान्य दिव्यासारखा दिसणारा काही विशेष प्रकारचा बल्ब प्रत्यक्षात गुप्त कॅमेरा असू शकतो. हॉटेलच्या खोलीत बल्बची नीट पाहणी करावी. जर त्यात लहान छिद्र असतील किंवा त्याचा कोणताही भाग अनोळखी वाटत असेल, तर शक्यता आहे की तो केवळ प्रकाश देणारा बल्ब नसून, तुमच्या हालचाली रेकॉर्ड करणारे यंत्र असू शकते.
इन्फ्रारेड लाइटचा शोध कसा घ्यावा ?
गुप्त कॅमेरे अनेकदा इन्फ्रारेड तंत्रज्ञानाचा वापर करून रात्रीसुद्धा रेकॉर्डिंग करतात. हा प्रकाश डोळ्यांनी सहज दिसत नाही, पण तो मोबाईल कॅमेऱ्यात दिसू शकतो. खोलीतील सर्व दिवे बंद करून मोबाईलचा कॅमेरा चालू करा आणि हळूहळू खोलीभर फिरवा. जर कोणत्याही भागात हलकी चमक किंवा लुकलुकणारा लाल किंवा पांढरा प्रकाश दिसला, तर तिथे गुप्त कॅमेरा असण्याची शक्यता असते.
मोबाईल अॅप्सच्या मदतीने गुप्त कॅमेरा ओळखा
तुमच्या स्मार्टफोनमध्ये ‘Hidden Camera Detector’ किंवा तत्सम अॅप्स इंस्टॉल करून तुम्ही गुप्त कॅमेऱ्यांचा शोध घेऊ शकता. या अॅप्सच्या मदतीने इलेक्ट्रो-मॅग्नेटिक रेडिएशन ट्रॅक करता येते, जे बहुतेक सीसीटीव्ही कॅमेऱ्यांमधून उत्सर्जित होते. अॅप वापरताना तुमच्या मोबाईल स्क्रीनवर असलेल्या निर्देशांचे पालन करून संशयास्पद ठिकाणी स्कॅन करा.
मोबाईल सिग्नल आणि वाय-फाय स्कॅन करून शोध कसा घ्यावा?
गुप्त कॅमेरे अनेकदा वाय-फाय किंवा ब्लूटूथ नेटवर्कला जोडलेले असतात. तुमच्या फोनच्या वाय-फाय किंवा ब्लूटूथ सेटिंग्जमध्ये जाऊन पाहा की काही अज्ञात डिव्हाइसेस जोडले आहेत का. जर तुम्हाला अनोळखी नाव असलेले कोणतेही उपकरण दिसले, तर त्या ठिकाणी लपलेला कॅमेरा असण्याची शक्यता असते. तसेच, मोबाइलवर कॉल करण्याचा प्रयत्न करताना सिग्नलमध्ये अडथळा जाणवला, तर त्या ठिकाणी गुप्त कॅमेरा असू शकतो.
टॉर्चच्या मदतीने गुप्त कॅमेरे शोधा
मोबाईलच्या फ्लॅशलाइटचा वापर करून तुम्ही गुप्त कॅमेऱ्यांचा शोध घेऊ शकता. खोलीतील लाईट बंद करा आणि शक्य त्या प्रत्येक संशयास्पद उपकरणावर टॉर्चचा प्रकाश टाका. जर त्या भागात प्रकाश परावर्तित होत असेल किंवा एखाद्या लहान छिद्रातून चमक दिसत असेल, तर त्या ठिकाणी गुप्त कॅमेरा असू शकतो.
संशयास्पद काही आढळल्यास काय करावे?
जर तुम्हाला हॉटेलच्या खोलीत कोणतेही संशयास्पद उपकरण आढळले, तर लगेच हॉटेल प्रशासनाला त्याबद्दल माहिती द्या. हॉटेल स्टाफ योग्य उत्तर देत नसल्यास, तात्काळ स्थानिक पोलिसांकडे तक्रार करा. अशा प्रकरणांमध्ये निष्काळजीपणा केल्यास, तुमच्या गोपनीयतेला आणि सुरक्षेला धोका निर्माण होऊ शकतो.
सावधगिरी बाळगून सुरक्षित प्रवास करा
प्रवासादरम्यान गोपनीयतेचे संरक्षण करणे अत्यंत आवश्यक आहे. हॉटेलमध्ये राहण्यापूर्वी खोलीची नीट तपासणी करणे, इलेक्ट्रॉनिक उपकरणांची बारकाईने पाहणी करणे आणि नवीन तंत्रज्ञानाच्या मदतीने गुप्त कॅमेरे शोधणे हे उपाय आपल्या सुरक्षिततेसाठी उपयुक्त ठरू शकतात. अशा प्रकारच्या घटनांपासून सावध राहणे आणि योग्य वेळी कारवाई करणे ही काळाची गरज आहे.
