सरकारी धोरणातील त्रुटींमुळे शेतकऱ्यांची आर्थिक परिस्थिती अधिकच दयनीय होत आहे. हमीभाव आणि उत्पादन खर्च यामध्ये तफावत वाढल्याने शेतकरी मोठ्या आर्थिक अडचणीत सापडले आहेत. व्यापारी हमीभावापेक्षा कमी दराने शेतमाल खरेदी करत असल्याने शेतकऱ्यांचे मोठे नुकसान होत आहे. त्यामुळे पूर्ण कर्जमाफी ही काळाची गरज आहे, असे मत शेतकरी संघटनेचे राज्य उपाध्यक्ष तथा ज्येष्ठ विधिज्ञ अॅड. अजित काळे यांनी व्यक्त केले.
कर्जमुक्तीसाठी पुणे येथे मोर्चा
शेतकरी संघटनेच्या वतीने १९ मार्च रोजी पुणे येथे कर्जमुक्ती मोर्चाचे आयोजन करण्यात आले आहे. या मोर्चाच्या जनजागृतीसाठी राज्यभर अभियान राबवले जात असून टाकळीभान सेवा संस्थेच्या सभागृहात यासंदर्भात मार्गदर्शन कार्यक्रम आयोजित करण्यात आला होता. या वेळी प्रगतशील शेतकरी व माजी सरपंच मंजाबापू थोरात अध्यक्षस्थानी होते. तसेच शेतकरी संघटनेचे जिल्हाध्यक्ष अनिल औताडे, तालुकाध्यक्ष युवराज जगताप, सुदामराव औताडे, साहेबराव चोरमळ, हरीभाऊ तुवर, राजेंद्र कोकणे, विकास नवले आदी पदाधिकारी उपस्थित होते.
शेतकऱ्यांच्या समस्या
मार्गदर्शन करताना अॅड. अजित काळे म्हणाले की, शेतकऱ्यांना देण्यात येणाऱ्या योजना अनेक त्रुटींनी ग्रासलेल्या आहेत. राज्य सहकारी बँक आणि जिल्हा सहकारी बँका शेतकऱ्यांची लूट करीत असून शेतकऱ्यांना कर्ज वितरणाच्या प्रक्रियेत दलाली आणि उच्च व्याजदरामुळे मोठ्या अडचणी येतात. यावर उपाय म्हणून नाबार्ड बँकेने थेट सेवा सोसायट्यांना कर्जवाटप करून शेतकऱ्यांच्या खात्यात थेट पैसे जमा करावेत, अशी मागणी त्यांनी केली.
सरकारच्या हमीभाव धोरणावरही त्यांनी टीका केली. हमीभाव निश्चित करण्यात येत असला तरी प्रत्यक्षात बाजारात शेतमाल याच दराने खरेदी केला जात नाही. परिणामी, शेतकऱ्यांना उत्पादन खर्चही वसूल होत नाही, त्यामुळे शेती तोट्याची ठरत आहे आणि शेतकरी कर्जाच्या विळख्यात अडकत आहेत.
सरकारी यंत्रणा निष्क्रिय
सरकारने तयार केलेली शेतकरी सहाय्य व्यवस्था कुचकामी ठरत आहे. हमीभावाप्रमाणे शेतमाल खरेदी केली जात नसल्याने उत्पादन खर्च आणि विक्रीत मोठी तफावत राहते, यामुळे शेतकऱ्यांचे अर्थचक्र बिघडते. शेतकऱ्यांना उत्पादन खर्चावर हमीभावासह योग्य नफा मिळावा, यासाठी सरकारने ठोस पावले उचलली पाहिजेत, असेही त्यांनी सांगितले.
१९ मार्चच्या आंदोलनाला मोठा प्रतिसाद अपेक्षित
शेतकरी कर्जमुक्तीसाठी १९ मार्च रोजी पुणे येथे भव्य मोर्चाचे आयोजन करण्यात आले असून, शेतकऱ्यांनी मोठ्या संख्येने या आंदोलनात सहभागी होण्याचे आवाहन अॅड. काळे यांनी केले.
