अहिल्यानगर : लग्नासाठी मुलगी पहावयास मोटारसायकलवर चाललेल्या तरुणाचा अपघातात दुर्देवी मृत्यू झाल्याची घटना नगर – पुणे महामार्गावर वाडेगव्हाण (ता. पारनेर) शिवारात घडली. पवन उत्तम चव्हाण (रा.चोरपांघरा, ता.लोणार, जि.बुलढाणा) असे मयत तरुणाचे नाव आहे. तर त्याचा मित्र सूरज प्रकाश राठोड (रा.जांभोरा, ता.सिंदखेडराजा, जि.बुलढाणा) जखमी झाला आहे.
मंगळवारी (दि. ११ मार्च) मध्यरात्रीच्या सुमारास हा अपघात झाला. मयत पवन चव्हाण हा त्याचा मित्र सूरज राठोड याच्यासोबत मोटारसायकलवर मुलगी पाहण्यासाठी लोणीकंद येथून अहिल्यानगर मार्गे चोरपांघरा, ता.लोणार येथे निघाले होते. पारनेर तालुक्यातील वाडेगव्हाण शिवारात त्यांच्या दुचाकीला लक्झरी बसने कट मारल्याने दोघे दुचाकीसह रस्त्यावर असलेल्या दुभाजकावर आदळले. त्यामुळे पवन चव्हाण उडून रस्त्याच्या दुसऱ्या बाजूला जावून पडला. त्याचवेळी नगरहून पुण्याकडे चाललेले पिकअप वाहन त्याच्या शरीरावरुन भरधाव वेगात गेल्याने पवन गंभीर जखमी झाला.
रस्त्यावरील प्रवाशांनी तात्काळ पोलिसांना माहिती दिली. त्यानंतर सूरज व जखमी पवन यांना सुपा येथील खाजगी रुग्णालयात दाखल करण्यात आले. उपचारादरम्यान बुधवारी (दि.१२ मार्च) पहाटेच्या सुमारास पवन उत्तम चव्हाण याचा मृत्य झाला. याबाबत सूरज प्रकाश राठोड याने सुपा पोलिस ठाण्यात दिलेल्या फिर्यादीवरून पोलिसांनी लक्झरी बस चालकाविरुद्ध गुन्हा दाखल केला आहे. पुढील तपास पोलीस निरीक्षक सोमनाथ दिवटे यांच्या मार्गदर्शनाखाली सुपा पोलीस करत आहेत.
