8th Pay Commission : तारीख 17 जानेवारी 2025, याच दिवशी केंद्रातील मोदी सरकारने देशभरातील केंद्रीय सरकारी कर्मचाऱ्यांसाठी एक मोठा निर्णय घेतला, या दिवशी केंद्र सरकारने 8 व्या वेतन आयोगाला मान्यता दिली आहे. केंद्र सरकारने आठव्या वेतन आयोगाला मान्यता दिली असली तरी देखील अजून याची समिती काही स्थापित झालेली नाही. पण, लवकरच या समितीची स्थापना होणार आहे आणि ही समिती आठवा वेतन आयोगासाठी शिफारशी निश्चित करून या शिफारशी सरकारला सुपूर्द करणार आहे.
पुढे सरकारी या शिफारशी स्वीकारून सरकारी कर्मचाऱ्यांसाठी आठवा वेतन आयोग लागू करणार आहे. 8वा वेतन आयोग आल्यानंतर केंद्रीय कर्मचारी आणि पेन्शनधारकांना पगारवाढीचा लाभ मिळणार आहे. या नव्या वेतन आयोगाचा देशातील एक कोटीहून अधिक केंद्रीय कर्मचारी आणि पेन्शनधारकांना लाभ मिळणार आहे.
या वेतन आयोगाची स्थापना 2025 मध्ये झाली असली तरी देखील याची अंमलबजावणी ही एक जानेवारी 2026 पासून होईल अशी शक्यता आहे. खरे तर सध्याचा सातवा वेतन आयोग हा 1 जानेवारी 2016 पासून लागू आहे. वेतन आयोगाचा आत्तापर्यंतचा इतिहास पाहिला असता प्रत्येक दहा वर्षांनी नवा वेतन आयोग लागू होतो.
यानुसार आता आठवा वेतन आयोग 1 जानेवारी 2026 पासून लागू होईल असे म्हटले जात आहे. यामुळे सध्या शिपाई, लिपिक, हवालदार आणि करोडो कर्मचारी आठवा वेतन आयोग लागू झाल्यानंतर आपला पगार किती निर्माण याचे गणित आणि आकडेमोड करण्यात व्यस्त आहेत. 2016 मध्ये 7 वा वेतन आयोग लागू करण्यात आला होता, ज्यामध्ये कर्मचाऱ्यांच्या पगारात चांगली वाढ झाली होती.
यामुळे पुढील वर्षी लागू होणाऱ्या आठव्या वेतन आयोगात सुद्धा कर्मचाऱ्यांच्या पगारात मोठी वाढ होईल असा अंदाज आहे. दरम्यान आता आपण नवा वेतन आयोग लागू झाल्यानंतर हवालदार, क्लर्क, शिपाई अशा विविध पदांवर काम करणाऱ्या कर्मचाऱ्यांचा पगार कितीने वाढणार ? हे समजून घेणार आहोत.
किती वाढणार पगार?
8 व्या वेतन आयोगांतर्गत, फिटमेंट फॅक्टरच्या आधारे वेतन वाढविले जाईल. हा एक गुणक आहे, ज्याद्वारे विद्यमान मूळ वेतनाचा गुणाकार करून नवीन पगार निश्चित केला जातो. 7 व्या वेतन आयोगात ते 2.57 होते, ज्यामुळे कर्मचाऱ्यांचे किमान वेतन 7,000 रुपयांवरून 18,000 रुपये करण्यात आले.
यावेळी फिटमेंट फॅक्टर 2.86 असेल असा अंदाज वर्तवण्यात आला आहे. पण जर फिटमेंट फॅक्टर 2.86 राहिला तर कर्मचाऱ्यांचे किमान मूळ वेतन 18,000 रुपयांवरून 51,480 रुपयांपर्यंत वाढू शकते. त्याचप्रमाणे पेन्शन 9,000 रुपयांवरून 25,740 रुपयांपर्यंत वाढू शकते.
हवालदार, लिपिक, शिपायाला किती पगार मिळणार?
आठवा वेतन आयोग लागू झाल्यानंतर सर्वात खालच्या स्तरावरील म्हणजे लेव्हल-1 कर्मचारी, जसे की शिपाई आणि अटेंडंट यांचा पगार 18,000 वरून 51,480 पर्यंत वाढण्याची शक्यता आहे. त्याचप्रमाणे, लोअर डिव्हिजन क्लर्क (LDC) चे वेतन 19,900 रुपयांवरून 56,914 रुपयांपर्यंत वाढू शकते.
कॉन्स्टेबल आणि कुशल कर्मचाऱ्यांचा पगार देखील 62,062 रुपयांपर्यंत वाढू शकतो, जो की सध्या 21,700 रुपये आहे. त्याच वेळी, स्टेनोग्राफर आणि कनिष्ठ लिपिक यांचा सध्याचा पगार 25,500 रुपयांवरून 72,930 रुपयांपर्यंत वाढू शकतो.
वरिष्ठ लिपिक आणि तांत्रिक कर्मचाऱ्यांच्या वेतनातही मोठी वाढ होणार आहे. सध्या या नोकरदार मंडळीला 29,200 रुपये इतकं वेतन मिळत आहे, जे की नव्या वेतन आयोगाच्या अंमलबजावणीनंतर 83,512 रुपयांपर्यंत वाढण्याची शक्यता आहे.
