Mauli Gavane Murder Case : श्रीगोंदा तालुक्यातील दाणेवाडी येथे १२ मार्च रोजी एका अनोळखी युवकाचा मृतदेह आढळून आला होता. विठ्ठल मांडगे यांच्या शेतातील विहिरीत पोत्यात भरलेला मृतदेह सापडल्याने परिसरात खळबळ उडाली. पोलिसांनी मृतदेहाची पाहणी केली असता त्याचे मुंडके, दोन्ही हात आणि उजवा पाय धडापासून वेगळे करण्यात आल्याचे समोर आले. ही हत्या अत्यंत निर्दयपणे करण्यात आल्याने तपास यंत्रणा सतर्क झाली आणि गुन्ह्याचा तपास तातडीने सुरू करण्यात आला.
सुरुवातीला मृत व्यक्ती अनोळखी असल्याने पोलिसांनी जिल्ह्यातील मिसिंग नोंदींची पडताळणी सुरू केली. तांत्रिक विश्लेषण, सीसीटीव्ही फुटेज आणि मृतदेहाच्या शारीरिक वैशिष्ट्यांच्या आधारे त्याची ओळख पटवण्यात आली. मृत युवक माऊली सतीश गव्हाणे (वय १९, रा. दाणेवाडी, पो. राजापूर, ता. श्रीगोंदा) असल्याचे निष्पन्न झाले. मृताच्या कुटुंबीयांकडून आणि ओळखीच्या लोकांकडून चौकशी केल्यानंतर पोलिसांना महत्त्वाची माहिती मिळाली.
माऊली गव्हाणे याचा खून कोणत्या कारणाने करण्यात आला याचा शोध घेत असताना पोलिसांना एक महत्त्वाचा धागा सापडला. तपासादरम्यान समोर आले की, संशयित आरोपी सागर दादाभाऊ गव्हाणे (वय २०, रा. दाणेवाडी) आणि त्याच्या एका मित्राचे समलैंगिक संबंध होते. या गोष्टीची माहिती माऊली गव्हाणेला होती त्यामुळे रागाच्या भरात त्याला संपवण्याचा कट आखण्यात आला.
संशयित आरोपींनी कट रचून माऊलीला फसवून बोलावले आणि त्याचा इलेक्ट्रिक कटरच्या सहाय्याने निर्घृण खून केला. पुरावे नष्ट करण्यासाठी त्याचे मुंडके, हात आणि पाय वेगळे करून मृतदेह पोत्यात भरून विहिरीत टाकण्यात आला. हे प्रकरण पूर्णपणे वैयक्तिक वादावर आधारित आहे की त्यामागे आणखी काही मोठे कारण आहे, याचा शोध घेण्याचे काम पोलीस करत आहेत.
१६ मार्च रोजी स्थानिक गुन्हे शाखेच्या पथकाने तांत्रिक तपास व गुप्त माहितीच्या आधारे सागर गव्हाणे याला ताब्यात घेतले. चौकशी दरम्यान त्याने गुन्ह्याची कबुली दिली असून, त्याच्याविरोधात ठोस पुरावे पोलिसांना मिळाले आहेत. या प्रकरणात आणखी आरोपी असल्याचे पोलीस तपासातून समोर आले आहे आणि त्यांचा शोध सुरू आहे. लवकरच या आरोपींना अटक केली जाईल.
हा गुन्हा अत्यंत गंभीर स्वरूपाचा असल्याने पोलीस अधीक्षक राकेश ओला यांनी तपासाची जबाबदारी स्थानिक गुन्हे शाखेच्या पोलीस निरीक्षक दिनेश आहेर यांच्याकडे सोपवली होती. पोलीस निरीक्षक आहेर यांच्या मार्गदर्शनाखाली उपनिरीक्षक तुषार धाकराव, पोलीस अंमलदार बापूसाहेब फोलाणे, शाहीद शेख, बिरप्पा करमल, अरुण गांगुर्डे, संतोष खैरे, रविंद्र घुंगासे, आकाश काळे, विशाल तनपुरे, सागर ससाणे, प्रमोद जाधव, रोहित मिसाळ, अशोक लिपणे, अमोल कोतकर, मनोज लातुरकर, जालिंदर माने, फुरकान शेख, प्रशांत राठोड, मेघराज कोल्हे आणि महादेव भांड यांनी उल्लेखनीय कामगिरी बजावली.
गुन्ह्याचा उलगडा झाला असला तरी पोलिसांना अजूनही उर्वरित आरोपींना अटक करायची आहे. तसेच, ही हत्या केवळ व्यक्तिगत रागातून झाली, की यामागे आणखी काही मोठे कारण आहे, याचा शोध पोलीस घेत आहेत. आरोपींवर खून, कट रचणे आणि पुरावे नष्ट करण्याच्या कलमांखाली गुन्हा दाखल करण्यात आला आहे. पुढील काही दिवसांत या प्रकरणात आणखी खुलासे होण्याची शक्यता आहे.
