अहिल्यानगर एमआयडीसी परिसरात दोन वेगवेगळ्या घटनांमध्ये एका अल्पवयीन मुलासह एका तरुणाने आत्महत्या केल्याची धक्कादायक माहिती समोर आली आहे. रविवारी आणि सोमवारी या घटना घडल्या असून,
पोलिसांनी अकस्मात मृत्यूची नोंद केली आहे. आत्महत्येची कारणे स्पष्ट नाहीत, मात्र पोलिस विविध अंगांनी तपास करत आहेत. या घटनांमुळे परिसरात हळहळ व्यक्त होत आहे.
१६ वर्षीय मुलाने घेतला गळफास
पहिली घटना नगर तालुक्यातील वडगाव गुप्ता येथे घडली. येथे १६ वर्षीय तन्मय गोविंद उसनाळे या अल्पवयीन मुलाने आपल्या राहत्या खोलीत गळफास घेऊन आत्महत्या केली. तन्मय मूळचा लातूर जिल्ह्यातील अनसारवाडी गावचा रहिवासी होता.
सध्या तो उपडे मळा, वडगाव गुप्ता येथे बाबासाहेब गव्हाणे यांच्या खोलीत राहत होता. रविवारी दुपारी त्याने लोखंडी अँगलला टॉवेलच्या सहाय्याने गळफास घेतला. कुटुंबीयांनी हा प्रकार लक्षात घेताच त्याला तातडीने मदत करण्याचा प्रयत्न केला, मात्र तोवर उशीर झाला होता. या घटनेचा तपास अंमलदार पितळे करीत आहेत.
एमआयडीसीत २८ वर्षीय तरुणाची आत्महत्या
दुसरी घटना एमआयडीसी परिसरातील एफ-९ ब्लॉक येथे घडली. येथे २८ वर्षीय वसंत लाल चकट या तरुणाने आत्महत्या केली. सोमवारी सकाळी हा प्रकार उघडकीस आला.
स्थानिक नागरिकांनी पोलिसांना माहिती दिल्यानंतर एमआयडीसी पोलिसांनी घटनास्थळी धाव घेतली. पोलिसांनी अकस्मात मृत्यूची नोंद केली असून, आत्महत्येचे कारण शोधण्यासाठी तपास सुरू आहे.
