श्रीरामपूर येथे एका संशयित वाहनाला अडवल्यानंतर वाहनचालकाने थेट पोलिस हवालदारालाच घेऊन पलायन केल्याची धक्कादायक घटना समोर आली आहे. पोलिसांनी जनावरे घेऊन जाणाऱ्या एका पिकअप वाहनाला रोखले आणि तपासणीसाठी हवालदार आजिनाथ आंधळे त्यात बसले. मात्र, पोलिस ठाण्याकडे जाण्याऐवजी आरोपीने भरधाव वेगाने वाहन दुसऱ्याच दिशेने पळवले.
संशयित वाहनचालकाने पोलिस ठाण्याऐवजी दुसऱ्या मार्गाने वाहन पळवले असता, गोंधवणी रस्त्याजवळील गतिरोधकामुळे वाहनाचा वेग काहीसा कमी झाला. या संधीचा फायदा घेत हवालदार आंधळे यांनी वाहनातून उडी मारली आणि कशीबशी स्वतःची सुटका करून घेतली. या घटनेनंतर शहरात मोठी खळबळ उडाली आहे.
या घटनेनंतर हवालदार आजिनाथ आंधळे यांनी पोलिस ठाण्यात फिर्याद दाखल केली. त्यानुसार राहुरी तालुक्यातील मानोरी येथील रफिक शेख याच्या विरुद्ध गुन्हा दाखल करण्यात आला आहे. पोलिस आता पुढील तपास करत आहेत.
शहरातील बेलापूर रस्त्यावरून जनावरे घेऊन जाणाऱ्या एका पिकअपची माहिती पोलिसांना मिळाली होती. त्यानंतर पोलिसांनी सिद्धिविनायक चौक येथे सापळा रचून वाहन अडवले. तपासणीअंती, त्या पिकअपमध्ये जनावरे असल्याचे दिसून आले. हवालदार आंधळे हे पुढील कारवाईसाठी वाहनात बसले, मात्र अचानक चालकाने वेग वाढवत त्यांना घेऊन पळण्याचा प्रयत्न केला.
या घटनेत हवालदार आंधळे यांची प्रसंगावधानामुळे सुटका झाली. मात्र, पोलिसांपासून पळण्याचा हा प्रकार गंभीर असून, संबंधित आरोपीवर कडक कारवाई करण्यात येणार आहे. पोलिस अधिक तपास करत असून, आरोपीच्या इतर संभाव्य गुन्ह्यांचा शोध घेतला जात आहे.
