अहिल्यानगर शहरातील रस्ते विद्युतीकरणासाठी ५ कोटींचा निधी मंजूर, आमदार संग्राम जगताप यांची माहितीशहरातल्या रस्त्यांचं विद्युतीकरण, गटारं, पाइपलाइन आणि इतर कामांसाठी जिल्हा नियोजन समितीकडून ५ कोटी ४० लाखांचा निधी मंजूर झालाय. ही कामं लवकरच सुरू होणार असल्याची माहिती आमदार संग्राम जगताप यांनी दिली. या निधीमुळे अहिल्यानगरातल्या नागरिकांना मूलभूत सुविधा मिळण्यात मोठी मदत होणार आहे. अहिल्यानगरात सध्या अनेक रस्त्यांची आणि प्रकल्पांची कामं जोरात सुरू आहेत. मुख्य रस्त्यांबरोबरच उपनगरातल्या रस्त्यांचंही काम मार्गी लागलंय.
त्यामुळे लोकांमध्ये समाधान पसरलंय. नागरिक बऱ्याच दिवसांपासून रस्ते, पाइपलाइन आणि विद्युतीकरणाच्या कामांची मागणी करत होते. त्यानुसार आमदार जगताप यांनी या भागांची पाहणी केली आणि प्रस्ताव तयार केला. हा प्रस्ताव मंजूर व्हावा यासाठी त्यांनी जिल्ह्याचे पालकमंत्री राधाकृष्ण विखे पाटील यांच्याकडे सातत्याने पाठपुरावा केला. त्यांच्या प्रयत्नांना यश आलं आणि विविध खात्यांतून विकासकामांसाठी हा निधी मिळाला, असं जगताप यांनी सांगितलं. ते म्हणाले, “गेल्या दहा वर्षांचा विकासाचा बॅकलॉग भरून काढण्याचं काम सुरू आहे.
निवडणुकीसाठी फक्त आश्वासनं देण्यापेक्षा प्रत्यक्ष कामं पूर्ण करणं महत्त्वाचं आहे. शहरातली अनेक रस्त्यांची कामं हाती घेतली आहेत. यातली काही कामं प्रगतीपथावर आहेत, तर काही मोठी प्रकल्पंही सुरू झाली आहेत.” या निधीमुळे नागरिकांना पायाभूत सुविधा मिळत असल्याचं त्यांनी अधोरेखित केलं. या निधीतून कोणती कामं होणार आहेत? प्रभाग क्रमांक ११ मधल्या इंदिरानगर झोपडपट्टीत डीपी रस्ता विकसित करण्यासाठी २ कोटी ७० लाख रुपये मंजूर झालेत. शिवाजीनगरातल्या पाण्याच्या टाकीपासून गट क्रमांक १८२/२ पर्यंत एचडीपीई पाइपलाइन टाकण्यासाठी १० लाख रुपये मिळालेत.
प्रभाग क्रमांक ८ मधल्या वारुळाचा मारुती रोडवर खंडोबा मंदिरापासून मुख्य नाल्यापर्यंत ४५० एमएसआरसी पाइप गटारासाठी ३६ लाख रुपये आहेत. कल्याण रोडवर गणेशनगर पाण्याच्या टाकीपासून खंडोबा मंदिरापर्यंत पाइपलाइनसाठी ३३ लाख, प्रभाग २ मध्ये सनी पॅलेसपासून ओढ्यापर्यंत ३०० एमएम गटारासाठी ९ लाख ९९ हजार आणि गुलमोहर रोडवर सुरभी हॉस्पिटलपासून कुष्ठधाम रोडपर्यंत रस्त्यावर विद्युतीकरणासाठी ६९ लाख रुपये खर्च होणार आहेत.
या कामांमुळे शहराचा चेहरामोहरा बदलणार आहे. नागरिकांच्या मागण्या पूर्ण करण्यासाठी आमदार जगताप यांचे प्रयत्न सुरू आहेत आणि हा निधी त्याच दिशेने टाकलेलं पाऊल आहे. आता ही कामं कधी पूर्ण होतात, याकडे सगळ्यांचं लक्ष लागलं आहे.
