कर्जत: कोळवडी ग्रामपंचायतीच्या निवडणुकीसाठी प्रसिद्ध झालेल्या प्रारूप मतदार यादीत ८२ बोगस मतदारांची नोंद झाल्याचा प्रकार समोर आला आहे. या यादीवर ग्रामस्थांनी लेखी हरकती नोंदवल्या आणि त्यावर मंगळवारी (दि. २५) तहसीलदार गुरु बिराजदार यांच्यासमोर सुनावणी झाली. आता तहसीलदार काय निर्णय देतात, याकडे संपूर्ण तालुक्याचं लक्ष लागलं आहे.
कोळवडीत बोगस मतदार नोंदणीचा मुद्दा चांगलाच गाजला. आगामी ग्रामपंचायत निवडणुकीच्या पार्श्वभूमीवर प्रारूप मतदार यादी जाहीर झाली आणि त्यात कर्जत नगरपंचायत हद्दीत राहणाऱ्या लोकांची नावं कोळवडीच्या यादीत आढळली. हे समोर आल्यानंतर गावकऱ्यांनी जोरदार आक्षेप घेतले. अंतिम यादी जाहीर होण्याआधीच या हरकतींवर सुनावणी घ्यावी लागली. तहसीलदारांसमोर झालेल्या या सुनावणीत सागर नलवडे यांच्यासह हरकती घेणारे ग्रामस्थ हजर होते.
सागर नलवडे यांनी पत्रकारांशी बोलताना सांगितलं, “या बोगस नावांना हटवण्यासाठी आम्ही गेल्या वर्षभरापासून प्रयत्न करतोय. कर्जत नगरपंचायत हद्दीतल्या भांडेवाडीत राहणाऱ्या लोकांची नावं कोळवडीच्या यादीत घुसडली आहेत. या लोकांनी नगरपंचायतीच्या निवडणुकीत मतदान केलंय. मग आता ते कोळवडीत कसे मतदान करू शकतात? आम्ही सगळे पुरावे निवडणूक निर्णय अधिकाऱ्यांना दिले आहेत. आम्हाला खात्री आहे की, यात न्याय मिळेल.”
राहुल नवले यांनीही यावर आपलं मत मांडलं. ते म्हणाले, “सत्ता मिळवण्यासाठीच ही नावं नोंदवली गेली आहेत. कायद्यातल्या त्रुटींचा गैरफायदा घेऊन हे सगळं सुरू आहे. प्रशासनाने याची गंभीर दखल घ्यायला हवी.” त्यांच्या म्हणण्यानुसार, हा प्रकार केवळ निवडणूक जिंकण्यासाठीच रचला गेलाय.
पोपट नलवडे यांनी तर या प्रकरणाची व्यथा मांडली. ते म्हणाले, “गेल्या वर्षभरापासून आम्ही शासनाकडे यासाठी पाठपुरावा करतोय. या बोगस मतदारांचे सगळे पुरावे दिले आहेत, तरीही आम्हाला न्याय मिळत नाहीये. गेल्या २५ वर्षांपासून या मतदारांनी कोळवडी ग्रामपंचायतीत मतदान केलेलं नाही. मग आता अचानक त्यांची नावं कशी आली?” त्यांनी हा प्रश्न उपस्थित करत प्रशासनाला धारेवर धरलं.
या सगळ्या घडामोडींमुळे कोळवडीत तणावाचं वातावरण आहे. ग्रामस्थांनी बोगस मतदारांविरोधात लढा उभारलाय आणि आता तहसीलदार गुरु बिराजदार यांच्या निकालाची वाट पाहतायत. हा निकाल काय असेल, यावर निवडणुकीचं भवितव्य ठरणार आहे. सगळ्यांचं लक्ष आता या निर्णयाकडे लागलं आहे.
