श्रीरामपूर तालुक्यातल्या अशोकनगर, निपाणी वडगाव, मातापूर आणि कारेगाव या परिसरातले नागरिक खड्डेमय रस्त्यांच्या त्रासाला कंटाळले होते. पण आता त्यांच्या या त्रासातून सुटका होण्याचा मार्ग मोकळा झालाय. पालकमंत्री राधाकृष्ण विखे पाटील यांनी या कामासाठी आपल्या निधीतून ५० लाखांचा पहिला हप्ता मंजूर केलाय. येत्या आठ दिवसांत या रस्त्याचं काम सुरू होणार असल्याची माहिती भाजपाचे श्रीरामपूर तालुकाध्यक्ष दीपक पटारे यांनी दिली.
गेल्या अनेक वर्षांपासून या भागातले रस्ते खराब अवस्थेत होते. लोकांना रोजच्या प्रवासात मोठी कसरत करावी लागायची. अशोकनगर रस्ता संघर्ष समितीने यावर तोडगा काढण्यासाठी लक्षवेधी आंदोलनाचा इशारा दिला होता. या सगळ्याची दखल घेऊन माजी खासदार डॉ. सुजय विखे पाटील यांनी तातडीनं पुढाकार घेतला. त्यांनी अधिकाऱ्यांबरोबर बैठक घेऊन रस्त्याचं काम मार्गी लावण्याच्या सूचना दिल्या. त्यानंतर रस्त्याची तांत्रिक पाहणी झाली आणि आता डबल चौकीपासून पहिल्या टप्प्यातलं काम लवकरच सुरू होणार आहे.
सार्वजनिक बांधकाम विभागाचे उपविभागीय अधिकारी बी. बी. वराळे आणि कनिष्ठ अभियंता दीपक मुंगसे यांनी प्रत्यक्ष जागेवर जाऊन पाहणी केली. संघर्ष समितीच्या सदस्यांबरोबर चर्चा करून त्यांनी रस्त्याची मोजमापंही घेतली. या कामाला गती मिळावी म्हणून भाजप तालुकाध्यक्ष दीपक पटारे, अंजाबापू गोल्हार, संजय गांधी योजनेचे अध्यक्ष गणेश मुदगुले, रामभाऊ जगताप, ग्रामपंचायत सदस्य अक्षय राऊत, विठ्ठल राऊत, माजी सरपंच आशिष दोंड यांच्यासह संघर्ष समितीचे लखन लोखंडे, श्रीकृष्ण बडाख, संजय राऊत, अशोक बोरुडे, प्रशांत शिंदे, बी. जी. गायधने, प्रवीण लोळगे, राजेंद्र देवकर, नईम पठाण, राजेंद्र सोनवणे, गणेश राऊत, चंद्रकांत मोरकर हे सगळे उपस्थित होते.
अनेक वर्षांच्या प्रतीक्षेनंतर हे काम सुरू होत असल्याने निपाणी वडगावच्या सरपंच वनिता राऊत, माजी सैनिक संघटनेचे तालुकाध्यक्ष बाळासाहेब ठंडे आणि ग्रामस्थांनी आनंद व्यक्त केलाय. त्यांनी पालकमंत्री विखे पाटील आणि इतरांचे आभार मानले. दीपक पटारे म्हणाले, “पालकमंत्र्यांनी निधी मंजूर केल्यामुळे अशोकनगरचा मुख्य रस्ता आता चांगल्या अवस्थेत येणार आहे.” आता हे काम कधी पूर्ण होतं, याकडे सगळ्यांचं लक्ष लागलंय.
