सोनई- शनि अमावास्या आणि गुढी पाडवा यानिमित्त शनिशिंगणापुरात मोठी यात्रा भरते. या काळात राज्यभरातून लाखो भाविक शनिदेवाच्या दर्शनासाठी येतात.यंदा उन्हाळा चांगलाच तापलाय, त्यामुळे भाविकांची कोणतीही अडचण होऊ नये म्हणून खास नियोजन केलं जातंय. उद्या, शनिवारी २९ मार्चला शनि अमावास्या आहे. या पार्श्वभूमीवर शनैश्वर देवस्थान आणि प्रशासनाने भाविकांच्या सोयीसाठी विशेष तयारी केली आहे.
शनिशिंगणापूरला येणाऱ्या तिन्ही रस्त्यांवर अर्ध्या किलोमीटरच्या आत खासगी शेतकऱ्यांच्या जमिनीवर वाहनतळ उभारले आहेत.
या नियोजनासाठी बुधवारी, १६ मार्चला शनैश्वर देवस्थानच्या जनसंपर्क कार्यालयात एक बैठक झाली. प्रांताधिकारी सुधीर पाटील यांच्या अध्यक्षतेखाली ही बैठक पार पडली.
यावेळी सोनईचे सहायक पोलिस निरीक्षक विजय माळी, शनिशिंगणापूरचे सहायक पोलिस निरीक्षक आशिष शेळके, निवासी नायब तहसीलदार चांगदेव बोरुडे, देवस्थानचे अध्यक्ष भागवत बानकर, उपाध्यक्ष विकास बानकर, मुख्य कार्यकारी अधिकारी जी. के. दरंदले, विश्वस्त मंडळाचे सदस्य आणि विविध विभागांचे अधिकारी उपस्थित होते.
या बैठकीत भाविकांच्या सोयी आणि सुरक्षेच्या दृष्टिकोनातून सविस्तर चर्चा झाली. भाविकांची वाहनं व्यवस्थित पार्क व्हावीत यासाठी तीन ठिकाणी खासगी वाहनतळाची सोय केली आहे.
छत्रपती संभाजीनगरहून येणाऱ्यांसाठी रमेश बानकर यांच्या जमिनीवर वाहनतळ तयार केलाय. राहुरीमार्गे येणाऱ्या भाविकांसाठी नवनाथ शेटे आणि बाळासाहेब बानकर यांच्या जमिनीवर वाहनतळ उभारलाय.
तर पोहेगावमार्गे येणाऱ्यांसाठी शनिशिंगणापूर ग्रामीण रुग्णालयाजवळ नाथ यांच्या जमिनीवर वाहनतळाची व्यवस्था आहे. भाविकांच्या सुरक्षेसाठी पोलिस उपअधीक्षक सुनील पाटील यांच्या मार्गदर्शनाखाली सोनई आणि शनिशिंगणापूर पोलिसांचा कडक बंदोबस्त ठेवण्यात आलाय.
यंदा उन्हाचा तडाखा जास्त आहे. त्यामुळे मंदिर परिसरात भाविकांच्या अभिषेक आणि पूजेसाठी सावलीचे मंडप उभारले आहेत. फरशीवरून चालताना पाय भाजू नयेत म्हणून मंदिराच्या प्रवेशद्वारापासून ते मंदिरापर्यंत मॅट अंथरले जाणार आहेत. शनि अमावास्येला गर्दीच्या वेळी शनि चौथरा दर्शन बंद ठेवला जाईल, जेणेकरून गोंधळ होणार नाही.
देवस्थानने ठिकठिकाणी पिण्याच्या पाण्याची सोय केली आहे. तसंच, भाविकांना तात्काळ वैद्यकीय मदत मिळावी म्हणून प्राथमिक आरोग्य केंद्र आणि शनैश्वर ग्रामीण रुग्णालयाच्या वतीने आरोग्य पथक तैनात आहे, असं मुख्य कार्यकारी अधिकारी जी. के. दरंदले यांनी सांगितलं.
या सगळ्या नियोजनामुळे भाविकांना दर्शनाचा आनंद घेता येईल आणि त्यांची कोणतीही गैरसोय होणार नाही, असा विश्वास देवस्थानला आहे. शनिशिंगणापूरची ही यात्रा दरवर्षी भाविकांसाठी खास असते आणि यंदाही प्रशासन आणि देवस्थान मिळून ती यशस्वी करण्यासाठी प्रयत्नशील आहे.
