अहिल्यानगर: कर्जत – जामखेड तालुक्यातील एमआयडीसी सुरुवातीपासूनच कळीचा मुद्दा ठरलेली आहे. यावरून आमदार रोहित पवार व सभापती राम शिंदे यांच्यात चांगलीच रस्सीखेच सुरू होती. या दरम्यान शिंदे यांनी आपले राजकीय कसब वापरून ही एमआयडीसी जामखेड ऐवजी कर्जत तालुक्यातील कोंभळी-थेरगाव-रवळगाव या ठिकाणी उभारण्यास मंजुरी मिळवली. तसा सर्वे देखिल झाला.
मात्र आता या भागातील स्थानिक शेतकरीच या एमआयडीसीला विरोध करत आहेत. त्यामुळे आता मोठा पेच निर्माण झाला आहे. कर्जत तालुक्यातील कोंभळी-थेरगाव-रवळगाव एमआयडीसीला खांडवी आणि परिसरातील सर्वसामान्य शेतकऱ्यांनी प्रखर विरोध केला असून आमच्या शेत-जमिनीच्या उताऱ्यावर शासनाने चुकीच्या पद्धतीने नोंद लावली असल्याचा मंगळवारी शेतजमीन बचाव कृती समितीच्यावतीने निषेध करण्यात आला.
यावेळी लोकप्रतिनिधीसह तालुका प्रशासनाच्या विरोधात तीव्र प्रतिक्रिया देत आक्रोष व्यक्त करण्यात आला. कर्जत-जामखेड मतदारसंघासाठीच्या एमआयडीसीकरीता कर्जत तालुक्यातील कोंभळी-थेरगाव आणि रवळगाव परिसरातील जमिनीचे अधिग्रहण प्रक्रिया प्रशासनाकडून सुरू झाली आहे.
मंगळवार, दि १ रोजी खांडवी परिसरातील सर्वसामान्य शेतकऱ्यांनी महिलांसह आंदोलन करीत शेतजमीनीच्या उताऱ्यावर विक्री करण्यास मनाई केल्याची नोंद प्रशासनाने लावल्याने निषेध व्यक्त केला. यावेळी रद्द करा, रद्द करा एमआयडीसी रद्द करा, आमच्या काळ्या आईचा सौदा रद्द करा, सुपीक जमिनीतून एमआयडीसी हद्दपार करा, यासह बेकायदेशीर एमआयडीसीला १०० टक्के विरोध, असा घोषणा देत राज्यसरकारसह तालुका प्रशासनाच्या विरोधात घोषणाबाजी केली.
आंदोलनात सुमन तापकीर, लता तापकीर, वैशाली तापकीर, शितल तापकीर, संगीता तापकीर, वंदना तापकीर, प्रमोद तापकीर, प्रदीप तापकीर, मिनीनाथ तापकीर, सुरेखा तापकीर, भारती गांगर्डे, मिरा तापकीर, निता तापकीर, सविता तापकीर, मनीषा तापकीर, अश्विनी तापकीर, राणी तापकीर, नंदा वायसे, अमित शेलार, भाऊसाहेब गोरखे, ऋषी गोरखे, पिन्टू उदमले आदींनी सहभाग घेतला होता.
काबाडकष्ट करून आम्ही जमीन घेतली. तर काहीच्या वडिलोपार्जित जमीन कसताना हाल अपेष्टा सहन करून कुटुंबाचा उदरनिर्वाह आम्ही करीत असताना ती जमीनच शासन आता आपल्या नावावर करीत असल्याने आमच्या पुढे मरणाशिवाय पर्याय नाही म्हणत एमआयडीसी रद्द न झाल्यास आत्मदहन करण्याचा इशारा आंदोलकांनी यावेळी दिला.
