अहिल्यानगर- जिल्ह्यातील दुधाच्या गुणवत्तेबाबत अन्न व औषध प्रशासनाने दिलेल्या माहितीनुसार, जिल्ह्यातून संकलित केलेल्या २०० दुधाच्या नमुन्यांपैकी १६० नमुने शुद्ध असल्याचे आढळले आहे. या नमुन्यांचे अहवाल नाशिक येथील प्रयोगशाळेतून प्राप्त झाले असून, यामुळे जिल्ह्यातील दूध शुद्ध असल्याचा दावा प्रशासनाने केला आहे.
उर्वरित ४० नमुन्यांचे अहवाल अद्याप प्रलंबित असून, ते लवकरच प्राप्त होतील, अशी माहितीही देण्यात आली आहे. या तपासणीमुळे दुधाच्या गुणवत्तेबाबत नागरिकांमध्ये असलेल्या शंकांना पूर्णविराम मिळण्याची शक्यता आहे.
दुधात भेसळ करणाऱ्यांवर कडक कारवाई
मुख्यमंत्री देवेंद्र फडणवीस यांनी शासकीय कार्यालयांना १०० दिवसांचा विशेष कार्यक्रम राबवण्याचे निर्देश दिले होते. या अंतर्गत दुधात भेसळ करणाऱ्यांवर कठोर कारवाई करण्याचेही आदेश देण्यात आले होते. या आदेशांचे पालन करत अन्न व औषध प्रशासनाने जिल्ह्यातील दूध उत्पादन आणि संकलन प्रक्रियेवर लक्ष केंद्रित केले.
मागील काही दिवसांत शेतकऱ्यांच्या गोठ्यांपासून ते दूध संकलन केंद्रांपर्यंत २०० नमुने गोळा करण्यात आले. हे नमुने नाशिक येथील प्रयोगशाळेत तपासणीसाठी पाठवण्यात आले आणि आतापर्यंत १६० नमुन्यांचे अहवाल प्राप्त झाले आहेत, जे सर्व सकारात्मक असल्याचे प्रशासनाने स्पष्ट केले.
अन्न व औषध प्रशासनाकडून नमुने गोळा
जिल्ह्यात दूध संकलन मोठ्या प्रमाणात होते आणि हे दूध मुंबईसह इतर मोठ्या शहरांमध्ये विक्रीसाठी पाठवले जाते. काही दिवसांपूर्वी दुधात भेसळ होत असल्याच्या तक्रारी समोर आल्या होत्या, ज्यामुळे नागरिकांमध्ये चिंता निर्माण झाली होती.
भेसळयुक्त दूध आरोग्यासाठी हानिकारक ठरू शकते, हे लक्षात घेऊन अन्न व औषध प्रशासनाने तातडीने पावले उचलली. शेतकऱ्यांचे गोठे, दूध संकलन केंद्रे आणि शीत केंद्रांना भेटी देऊन नमुने गोळा करण्यात आले. या तपासणीमुळे दूध शुद्ध असल्याचे स्पष्ट झाले असून, नागरिकांना दिलासा मिळाला आहे.
४० नमुन्यांचे अहवाल बाकी
अन्न व औषध प्रशासनाचे सहायक आयुक्त सोपान इंगळे यांनी सांगितले की, जिल्ह्यातील दूध संकलन प्रक्रिया पारदर्शक आणि गुणवत्तापूर्ण असल्याचे या अहवालांवरून दिसते. १६० नमुन्यांचे अहवाल चांगले आले असून, उर्वरित ४० नमुन्यांचे अहवालही लवकरच प्राप्त होतील, अशी अपेक्षा त्यांनी व्यक्त केली.
