अहिल्यानगर: शिर्डी येथून विसापूर येथील भिक्षेकरी स्वीकार केंद्रात दाखल करण्यात आलेल्या 49 भिक्षेकऱ्यांपैकी केवळ एकाच व्यक्तीला त्याच्या नातेवाइकाने न्यायालयीन आदेशाद्वारे घरी नेले आहे. इतर भिक्षेकऱ्यांच्या कुटुंबीयांनी केंद्राशी कोणताही संपर्क साधलेला नाही, असे केंद्र प्रशासनाने नमूद केले आहे.
एकच भिक्षेकरी घरी
4 एप्रिल रोजी शिर्डीतील 49 भिक्षेकऱ्यांना प्रशासनाने ताब्यात घेऊन विसापूर येथील भिक्षेकरी स्वीकार केंद्रात हलवले होते. यापैकी चार जणांचा मृत्यू झाल्याने या कारवाईवर आणि केंद्राच्या व्यवस्थापनावर प्रश्न उपस्थित झाले आहेत.
भिक्षेकरी स्वीकार केंद्राचा उद्देश भिक्षेकऱ्यांचे पुनर्वसन करणे आणि त्यांना भिक्षा मागण्यापासून परावृत्त करणे हा आहे. सहसा अशा केंद्रात दाखल झालेल्या भिक्षेकऱ्यांना त्यांचे नातेवाईक न्यायालयाचा आदेश घेऊन घरी नेतात. मात्र, या 49 जणांपैकी फक्त एकाच भिक्षेकऱ्याच्या नातेवाइकाने संपर्क साधला आणि त्याला घरी नेले. बाकी कोणीही पुढे आले नाही, असे केंद्र प्रशासनाचे म्हणणे आहे.
स्विकार केंद्रावर प्रश्नचिन्ह
या भिक्षेकऱ्यांच्या नातेवाइकांशी केंद्राने स्वतःहून संपर्क साधण्याचा प्रयत्न केला का, असा सवाल विचारला असता, केंद्राचे अधिकारी सुशील तुरकणे यांनी सांगितले की, भिक्षेकऱ्यांचे आरोग्य सांभाळणे आणि इतर प्रशासकीय कामे यात कर्मचारी इतके गुंतले होते की, नातेवाइकांशी संपर्क करणे शक्य झाले नाही. यामुळे केंद्राची पुनर्वसन प्रक्रिया आणि कुटुंबीयांशी संनियंत्रण याबाबतच्या तयारीवर प्रश्नचिन्ह निर्माण झाले आहे.
भिक्षेकरी नसल्याचा आरोप
शिर्डीत ताब्यात घेण्यात आलेल्या काही व्यक्ती भिक्षेकरी नसून, त्या कामाच्या निमित्ताने तिथे आल्या होत्या, असा गंभीर आरोप समोर आला आहे. प्रशासनाने अशा व्यक्तींना चुकीच्या पद्धतीने भिक्षेकरी म्हणून पकडल्याचा दावा केला जात आहे.
जर खरंच असे झाले असेल, तर किती नातेवाइकांनी याबाबत तक्रार नोंदवली किंवा न्यायालयात जाऊन आपल्या व्यक्तींना सोडवण्याचा प्रयत्न केला, याची माहिती अस्पष्ट आहे. विसापूर केंद्राने केवळ एका कुटुंबाने संपर्क साधल्याचे सांगितले असून, इतर कोणीही अद्याप पुढे आले नसल्याचे त्यांचे मत आहे.
