अहिल्यानगरमधील पर्यटक श्रीनगरमध्ये अडकले, तृतीयपंथीयांच्या नेत्याही सहकाऱ्यासोबत श्रीनगरमध्ये सापडल्या अडचणीत

Ahilyanagar News: अहिल्यानगर- जम्मू ते श्रीनगर रस्त्यावर भूस्खलनामुळे वाहतूक पूर्णपणे ठप्प झाली आहे. यामुळे अहिल्यानगरसह राज्यातील अनेक पर्यटक श्रीनगरमध्ये अडकून पडले आहेत. पहलगाम येथील दहशतवादी हल्ल्याच्या पार्श्वभूमीवर निर्माण झालेल्या तणावामुळे परिस्थिती आणखी बिकट झाली आहे. अनेक पर्यटकांनी विमानाने परतण्याचा निर्णय घेतला असला, तरी रस्ते बंद असल्याने त्यांची अडचण वाढली आहे. स्थानिक नागरिकांचे सहकार्य मिळत असले, तरी पर्यटकांमध्ये अस्वस्थता आहे.

रस्ता बंद असल्याने पर्यटक अडकले

अहिल्यानगरचे रहिवासी सुनील वल्लाल सध्या श्रीनगरमध्ये त्यांच्या कुटुंबासह अडकले आहेत. त्यांच्याशी संपर्क साधला असता, त्यांनी सांगितले की, ते सुखरूप आहेत. “आम्ही चार जण आहोत. श्रीनगर सध्या बंद आहे, त्यामुळे हॉटेलमधून बाहेर पडणे शक्य झाले नाही. आम्ही १७ एप्रिल रोजी पहलगामला भेट देऊन परतलो होतो. आता रस्ता बंद असल्याने आम्ही विमानाचे तिकीट काढले आहे आणि शुक्रवारी हवाई मार्गाने परतणार आहोत,” असे त्यांनी सांगितले. स्थानिकांनी त्यांना चांगली मदत केल्याचेही त्यांनी नमूद केले.

सुनील वल्लाल, त्यांच्या पत्नी, साडू व्यंकटेश अरकल आणि त्यांच्या पत्नी असे चौघे १२ एप्रिल रोजी चौधरी टुर्स ट्रॅव्हल्समार्फत काश्मीरच्या सहलीसाठी गेले होते. नियोजित वेळापत्रकानुसार, ते मंगळवारी पहलगामला पोहोचणार होते. मात्र, ट्रॅव्हल कंपनीच्या व्यवस्थापकाने परिस्थितीचा अंदाज घेऊन मार्गात बदल केला आणि त्यांना ११ एप्रिल रोजीच पहलगामला नेले. त्यानंतर ते इतर पर्यटनस्थळांना भेट देत बुधवारी श्रीनगरला पोहोचले. “हा बदल नसता तर आम्ही मंगळवारी पहलगामलाच असतो. सुदैवाने आम्ही सुखरूप आहोत,” असे वल्लाल यांनी फोनवर सांगितले.
अकोले तालुक्यातील पर्यटकांचा समावेश

अकोले तालुक्यातील आर्किटेक्ट आकाश शिंदे आणि त्यांचे कुटुंबही पहलगामला पर्यटनासाठी गेले होते. ते सुखरूप असल्याची माहिती त्यांचे नातेवाईक पराग कोळपकर यांनी दिली. अहिल्यानगर आणि परिसरातील किती पर्यटक सध्या काश्मीरमध्ये अडकले आहेत, याची नेमकी आकडेवारी उपलब्ध नाही. मात्र, वैभव जोशी यांच्या मते, त्यांच्या यात्रा कंपनीचे चार पर्यटक सध्या तिथे आहेत.

अनेकांनी सहली केल्या रद्द

पहलगाम हल्ल्याच्या पार्श्वभूमीवर अनेकांनी सहली रद्द केल्या आहेत. अहिल्यानगरमधील सात जणांनी २४ एप्रिल रोजी श्रीनगरसाठी बुकिंग केले होते, पण त्यांनी तिकीट रद्द केले. तसेच, आठ जणांनी १ मे साठी केलेले बुकिंगही रद्द केले. तरीही, काही पर्यटकांनी आधीच बुकिंग केल्याने ते नियोजित वेळेनुसार काश्मीरला जात आहेत. “आज आमच्या कंपनीचा २०० जणांचा गट काश्मीरला गेला. पण, विमान तिकीट आणि हॉटेल बुकिंग रद्द केल्यास पैसे परत मिळण्याबाबत सरकारने स्पष्ट धोरण जाहीर करावे,” असे ट्रॅव्हल व्यावसायिक किशोर मरकड यांनी सांगितले.

तृतीयपंथीयांच्या नेत्या अडकल्या

तृतीयपंथी संघटनेच्या नेत्या काजल गुरु आणि त्यांचे सहकारीही सध्या श्रीनगरमध्ये अडकले आहेत. रस्ते बंद असल्याने त्यांचा गट अडचणीत आहे. त्यांनी सोशल मीडियावर व्हिडिओद्वारे शासनाकडे मदतीचे आवाहन केले आहे.