महाराष्ट्रातील राजकीय वातावरण पुन्हा एकदा तापण्यास सज्ज झाले आहे. गेल्या पाच वर्षांपासून रखडलेल्या स्थानिक स्वराज्य संस्थांच्या निवडणुका आता येत्या चार महिन्यांत होणार आहेत. सर्वोच्च न्यायालयाने महाराष्ट्र निवडणूक आयोगाला या निवडणुका घेण्याचे स्पष्ट आदेश दिले आहेत.
ओबीसी आरक्षणाच्या मुद्द्यामुळे या निवडणुका वारंवार स्थगित होत होत्या. मात्र, आता न्यायालयाने निवडणुका घेण्यास प्राधान्य देण्याचे निर्देश देत ओबीसी आरक्षणाबाबतची सुनावणी स्वतंत्रपणे सुरू ठेवण्याचे नमूद केले आहे. यामुळे स्थानिक स्वराज्य संस्थांच्या निवडणुकीचा मार्ग मोकळा झाला असून, लवकरच या निवडणुकीचे बिगूल वाजण्याची शक्यता आहे.
देवेंद्र फडणवीस यांनी स्पष्टच सांगितले
या निवडणुकीत कोण बाजी मारणार, याबाबत सर्वत्र उत्सुकता आहे. विशेषतः महायुतीच्या घटक पक्षांमधील अलीकडील राजकीय घडामोडी पाहता, स्थानिक पातळीवर महायुती एकत्रितपणे निवडणूक लढणार की स्वतंत्रपणे, याबाबत अनेक चर्चा सुरू होत्या. या सर्व चर्चांना पूर्णविराम देत मुख्यमंत्री देवेंद्र फडणवीस यांनी महत्त्वाचा खुलासा केला आहे.
महायुती एकत्रित
मुख्यमंत्री देवेंद्र फडणवीस यांनी याबाबत बोलताना सांगितले स्थानिक स्वराज्य संस्थांच्या निवडणुकीत महायुती एकत्रितपणे लढणार आहे. या घोषणेमुळे महायुतीच्या घटक पक्षांमधील समन्वय आणि एकजुटीचे संकेत मिळाले आहेत.
फडणवीस यांनी ही घोषणा उपमुख्यमंत्री एकनाथ शिंदे आणि अजित पवार यांच्यासह आयोजित पत्रकार परिषदेत केली, ज्यामुळे या वक्तव्याला अधिक महत्त्व प्राप्त झाले आहे. या पत्रकार परिषदेत तिन्ही नेत्यांनी एकत्र बसून महायुतीच्या एकजुटीचा संदेश दिला.
निवडणुकीची तयारी
राज्यातील अनेक प्रमुख शहरांमध्ये महापालिका आणि स्थानिक स्वराज्य संस्थांच्या निवडणुकीसाठी सर्वच राजकीय पक्षांनी मोर्चेबांधणी सुरू केली आहे. महायुतीच्या घटक पक्षांमध्येही या निवडणुकीसाठी जोरदार तयारी सुरू आहे. मात्र, काही ठिकाणी स्थानिक पातळीवर महायुतीच्या कार्यकर्त्यांमध्ये समन्वयाचा अभाव दिसून येत आहे.
यामुळे काही ठिकाणी महायुतीचे घटक पक्ष स्वतंत्रपणे निवडणूक लढतील, अशी शक्यता वर्तवली जात होती. परंतु, फडणवीस यांच्या घोषणेमुळे या सर्व शंकांना पूर्णविराम मिळाला आहे. महायुती एकत्रितपणे निवडणूक लढवून आपली ताकद दाखवण्याच्या तयारीत आहे.
