Pune News : कोणत्याही नावात एक ओळख लपलेली असते. मग ते नाव एखाद्या गावाचं असो, व्यक्तीचं असो नाहीतर एखाद्या प्राण्याचं. नावात काय आहे, असं विनोदाने म्हणतात. परंतु नावातच आपली ओळख असते, हेही तितकंच खरं. काही नावं कोमल असतात. काही नावं क्रुर असतात, तर काही नावं ही विचित्रही असतात. असंच एका गावाचं नाव आहे, जे उच्चारताना आपल्याला कसंसंच होतं.
विचित्र आहे नाव
हे गाव आहे पुणे जिल्ह्यातलं भोसरी. नावामुळे ते महाराष्ट्रात चर्चेत असतं. पुण्याच्या जवळ असल्याने भोसरीचाही प्रचंड विकास झाला आहे. मात्र या विचित्र नावामुळे हे गाव अनेकदा चर्चेत राहतं. मुळात भोसरी हे नाव पहिल्यापासून नव्हतं. तर या गावाच्या नावाचा अपभ्रंश होऊन हे नाव तयार झालं आहे, हे अनेकांना माहित नाही. या गावाला मोठी ऐतिहासिक ओळख आहे.
पैलवानांचं आहे गाव
महाराष्ट्रातील रांगड्या मातीचा खराखुरा चेहरा म्हणजे भोसरी. तालीमींचं गाव म्हणून पुणे परिसरात भोसरी ओळखली जाते. या गावाला श्री क्षेत्र आळंदी व श्री क्षेत्र देहूचा अगदी जवळ सहवास लाभलाय. पुण्याच्या राजकारणाचं महत्वाचे केंद्र म्हणूनही भोसरी ओळखलं जातं. भोसरी गावला जशी औद्योगिक, राजकीय ओळख आहे त्यापेक्षा मोठी ऐतिहासिक ओळखही आहे.
काय आहे इतिहास
प्रसिद्ध राजा भोज यांची राजधानी म्हणून या गावाला सुरुवातील भोजापूरी म्हणून ओळखलं जात होतं. याच भोजापुरी नावाचा अपभ्रंश होऊन ते आता भोसरी झाल्याचं काहींच म्हणणं आहे. पुणे शहराच्या उत्तरेला 17 किलोमीटरवर पिंपरी-चिंचवड महापालिकेच्या हद्दीत हे गाव आहे. प्राचीन काळापासून भोजापूरी, भवसरी अशा नावाने प्रवास करत या गावाला सध्या भोसरी हे नाव मिळाले आहे.
सापडतात इतिहासाच्या पाऊलखुणा
भोसरी गावात आजही इतिहासाच्या पाऊलखुणा सापडतात. मातीचे मडके तसेच काही बांधकामाच्या विटा आढळून आल्या असून हे मडके सातवाहन काळातील म्हणजे इ.स.पूर्वी 200 ते 280 च्या काळातील असल्याचे संशोधकांनी सिद्ध केले आहे. भोसरीतील ग्रामस्थांनी जत्रा-उत्सव, बैलगाडा शर्यत, कुस्त्यांचा आखाडा, तालीम मंडळ जपत गावपण जपले आहे. येथे भावसार समाजाची संख्या जास्त असल्याने काहींच्या मते भावसार या शब्दावरुन या गावाला भोसरी हे नाव पडलं असावं.
