Ahilyanagar News: भंडारदरा- गत आठवड्यात भंडारदरा धरणाच्या पाणलोट क्षेत्रात कोसळलेल्या अवकाळी पावसाने शासनाची डोकेदुखी दूर केली आहे. उन्हाळ्यात निर्माण होणारी भीषण पाणीटंचाई यावर्षी टळली असून टँकरवर दरवर्षी खर्च होणारे शासनाचे लाखो रुपये अवकाळी पावसामुळे वाचले आहेत. त्यामुळे यंदा अनेक गावांची तहान भागली असून, टँकरद्वारे पाणीपुरवठा करण्याची गरज भासलेली नाही.
अकोले तालुक्यात भंडारदरा धरणाच्या पाणलोट परिसरात उन्हाळा सुरू झाला की महिलांच्या पाण्यासाठीच्या वणवणीला सुरुवात होते. विशेषतः उडदावणे, पांजरे, रतनवाडी, मुतखेल, साम्रद या गावांना पाण्याचा तुटवडा जाणवतो. दरवर्षी भंडारदरा धरण १५ ऑगस्टपर्यंत पूर्ण क्षमतेने भरते. तोपर्यंत या गावांमध्ये पाणीटंचाई भासत नाही. मात्र धरणातील पाण्याचा वापर लाभक्षेत्रात शेतीसाठी व पिण्यासाठी सुरू झाला की, साठा कमी होतो. यामध्ये बाष्पीभवनाचा मोठा वाटा असतो.
अवकाळी पावसाने पाणलोट क्षेत्रात वाढ
यावर्षी मे महिन्याच्या पहिल्या पंधरवड्यात झालेल्या अवकाळी पावसामुळे धरणाच्या पाणलोट क्षेत्रात पाण्याची स्थिती सुधारली आहे. अनेक ठिकाणी भातखाचरे भरून गेल्यामुळे पाणीसाठा मुबलक झाला आहे. परिणामी, उडदावणे, पांजरे यांसह शेणीत,आंबेवंगण, लाडगाव, देवगाव, मान्हेरे या गावांमध्येही पाण्याची टंचाई जाणवलेली नाही. यामुळे शासनाला टँकरद्वारे पाणीपुरवठा करण्यासाठी लागणारा खर्च वाचला आहे.
अवकाळी पाऊस ठरला वरदान
भंडारदरा धरणाच्या पाणलोट क्षेत्रात कोसळलेल्या अवकाळी पावसामुळे यंदा अकोले तालुक्यातील अनेक गावांना उन्हाळ्यात पाण्याची तूट भासलेली नाही. टँकरची गरज भासली नसल्यामुळे शासनाचे मोठ्या प्रमाणावर आर्थिक नुकसान टळले आहे. यासोबतच गावकऱ्यांची दरवर्षीची तहानही भागली असून, जलसंकटाच्या दृष्टीने अवकाळी पाऊस यंदा वरदान ठरला आहे.
पाणी योजनांचा कुचकामीपणा
भंडारदरा धरणाच्या पाणलोट क्षेत्रात असलेल्या काही गावांमध्ये शासनाच्या पाणी योजना आहेत. मात्र या योजना वेळेवर आणि प्रभावीपणे कार्यान्वित न झाल्यामुळे त्या कुचकामी ठरल्या आहेत. त्यामुळे नागरिकांनी शासन यंत्रणेच्या कार्यक्षमतेवर नाराजी व्यक्त केली आहे. गावागावांमधून या योजना केवळ नावालाच उभ्या असल्याच्या तक्रारी ऐकावयास मिळत आहेत.
महिलांची पायपीट थांबली
उडदावणे गावात पूर्वी महिलांना एक ते दीड किलोमीटरवर असणाऱ्या विहिरीवरून पाणी आणावे लागे. यंदा मात्र ही परिस्थिती टळली. आंबेवंगण गावातील महिलांनी काही दिवसांपूर्वी पाण्यासाठी थेट अकोले येथे शासन दरबारी धरणे दिले होते. मात्र त्यानंतर झालेल्या पावसामुळे परिस्थिती नियंत्रणात आली.
