Business Idea:- आजच्या काळात जरी बायोफ्युएल आणि इलेक्ट्रिक वाहनांचा झपाट्याने विकास होत असला, तरी पेट्रोल आणि डिझेलसारख्या पारंपरिक इंधनांची गरज अजूनही मोठ्या प्रमाणावर कायम आहे. भारतासारख्या विकसनशील देशात वाहनांची संख्या दिवसेंदिवस वाढत असून त्यानुसार इंधनाची मागणीही वाढत आहे. त्यामुळे पेट्रोल पंप उघडण्याचा विचार केल्यास, तो दीर्घकालीन आणि फायदेशीर व्यवसाय ठरू शकतो. अनेक तरुण आणि व्यावसायिक या क्षेत्राकडे आकर्षित होत आहेत.कारण या व्यवसायातून नियमित उत्पन्न मिळण्याची शक्यता असते आणि पेट्रोल पंप चालवणे हे सामाजिक प्रतिष्ठेचेही लक्षण मानले जाते.
पेट्रोल पंप उघडण्यासाठी आवश्यक गोष्टी
अगोदर डीलरशिप मिळवणे महत्त्वाचे
पेट्रोल पंप उघडण्यासाठी सर्वप्रथम डीलरशिप मिळवणे आवश्यक असते. भारतात इंडियन ऑइल, भारत पेट्रोलियम, हिंदुस्थान पेट्रोलियम अशा काही मोठ्या कंपन्या आहेत ज्या आपली डीलरशिप देतात. या लेखात आपण इंडियन ऑइलच्या डीलरशिप प्रक्रियेविषयी माहिती घेणार आहोत. इंडियन ऑइल ही भारतातील सर्वात मोठी सार्वजनिक क्षेत्रातील तेल कंपनी आहे आणि तिच्या डीलरशिपसाठी अनेक लोक अर्ज करतात.
पेट्रोल पंप उघडण्यासाठी लागणारा खर्च
पेट्रोल पंप उघडण्यासाठी लागणारा खर्च हा पंप कुठे सुरू करायचा आहे यावर अवलंबून असतो. ग्रामीण भागात पेट्रोल पंप उघडण्यासाठी सुमारे १२ ते १५ लाख रुपयांची गरज भासते, तर शहरी किंवा शहरालगतच्या भागात हा खर्च २० ते २५ लाख रुपये होतो. या खर्चामध्ये जागेचे भाडे किंवा खरेदी, बांधकाम, टाक्या, मशीनरी, परवाने, वीजजोडणी, स्टाफ व्यवस्था यांचा समावेश होतो. पेट्रोल पंपसाठी कमीत कमी १२०० ते १५०० चौरस मीटर जागा लागते आणि ती रस्त्यालगत असावी लागते. ही जागा स्वतःची असावी किंवा दीर्घकालीन भाडेकरारावर घेतलेली असावी.
डीलरशिपसाठी अर्ज कसा कराल?
डीलरशिपसाठी अर्ज करण्यासाठी, इंडियन ऑइलच्या अधिकृत वेबसाइटला भेट देणे आवश्यक आहे. कंपनी वेळोवेळी त्यांच्या वेबसाइटवर किंवा वृत्तपत्रांत जाहिरातीद्वारे रिक्त डीलरशिपची माहिती देते. जाहिरातीत दिलेल्या निकषानुसार पात्र असलेल्या इच्छुकांनी ऑनलाईन किंवा ऑफलाईन पद्धतीने अर्ज करावा लागतो. अर्ज करताना उमेदवाराचे वय किमान २१ वर्षे आणि जास्तीत जास्त ६० वर्षे असावे. शैक्षणिक पात्रता दहावी पास असावी. काही प्रकरणांमध्ये खास श्रेणींना (जसे की महिला, अपंग, माजी सैनिक) वय आणि शिक्षणामध्ये सवलतीही दिल्या जातात.
आवश्यक परवानग्यांची गरज
पेट्रोल पंप सुरू करताना विविध सरकारी परवानग्यांची गरज असते. यामध्ये पर्यावरण परवाना, अग्निशमन विभागाचे प्रमाणपत्र, प्रदूषण नियंत्रण मंडळाची मंजुरी, स्थानिक प्राधिकरणाची परवानगी यांचा समावेश होतो. हे सर्व परवाने मिळविण्यासाठी वेळ लागतो, त्यामुळे प्रक्रियेची पूर्वतयारी करणे गरजेचे असते.
पेट्रोल पंप व्यवसायातून किती होते कमाई?
बचतीच्या दृष्टीने विचार करता, पेट्रोल पंप डीलरला प्रतिलिटर विक्रीवर २ ते ५ रुपये कमिशन मिळते. म्हणजे जर एखादा पंप दररोज १००० लिटर इंधन विकतो, तर त्याला दररोज सरासरी २,००० ते ५,००० रुपयांचे कमिशन मिळू शकते. दरमहा हे उत्पन्न ६०,००० ते १.५ लाख रुपये किंवा अधिकही होऊ शकते. अर्थात, इंधन विक्रीव्यतिरिक्त अनेक पेट्रोल पंप मालक अ‍ॅक्सेसरी शॉप, वॉशिंग सेंटर, एटीएम सेवा, आणि मिनरल वॉटर विक्रीसारख्या अतिरिक्त व्यवसायही चालवतात, जे नफा वाढवण्यास मदत करतात.
