ONGC Share Price:- शेअर बाजारात आज खळबळजनक हालचाल झाली. मध्य पूर्वेतील संघर्षामुळे जागतिक बाजारावर परिणाम झाला आणि त्याचे पडसाद आपल्याकडेही उमटले. इस्रायल इराण दरम्यानच्या तणावाने कच्च्या तेलाच्या दरात झपाट्याने वाढ केली आणि त्याचा थेट परिणाम काही कंपन्यांच्या शेअर्सवर दिसून आला. तेल शोधणाऱ्या कंपन्यांचे शेअर्स तेजीत राहिले, तर तेलावर प्रक्रिया करणाऱ्या कंपन्यांना फटका बसला.
आंतरराष्ट्रीय बाजारात कच्च्या तेलाच्या किमतीत वाढ
शुक्रवारी सकाळी इस्रायलने इराणवर हवाई हल्ला केल्याचे वृत्त आल्यापासून आंतरराष्ट्रीय बाजारात कच्च्या तेलाचे दर चढले. डब्ल्यूटीआय क्रूड जुलै फ्युचर्सची किंमत ११.६८ टक्क्यांनी वाढून ७५.९९ डॉलर प्रति बॅरलवर पोहोचली, तर ब्रेंट क्रूड ऑगस्ट फ्युचर्स ७७.२१ डॉलरवर गेले. ही वाढ तब्बल १० टक्क्यांच्या घरात गेली होती, आणि त्यामुळे जगभरात तेलसंबंधित कंपन्यांचे शेअर्स चढ-उतार करताना दिसले.
ओएनजीसी आणि ऑइल इंडियाच्या शेअर्स मध्ये वाढ
या घडामोडींमुळे भारतात ओएनजीसी आणि ऑइल इंडियाचे शेअर्स वाढले. सकाळी ओएनजीसीने सुमारे १.२७ टक्क्यांची उसळी घेत ₹२५१.०२ पर्यंत मजल मारली, तर ऑइल इंडिया जवळपास २.५ टक्क्यांनी वाढून ₹४७९.७५ वर पोहोचले. याउलट, आयओसीएल, बीपीसीएल आणि एचपीसीएल सारख्या तेल विक्री करणाऱ्या कंपन्यांचे शेअर्स घसरले. इंडियन ऑइल सुमारे २.७४ टक्क्यांनी खाली घसरून ₹१३९.०७ वर, बीपीसीएल ३.८० टक्क्यांनी घसरून ₹३०६.५५ वर आणि एचपीसीएल ₹३८०.२५ वर गेला.
तेल दरवाढीचा इतर क्षेत्राला फटका
तेलाच्या किमती वाढल्याने इतर क्षेत्रांनाही झळ बसली. पेंट कंपन्यांपैकी एशियन पेंट्स ₹२,१८४.२० वर घसरले, तर कान्साई नेरोलॅक ₹२४३.८५ पर्यंत खाली आले. याचवेळी विमान वाहतूक क्षेत्रही प्रभावात आले. इंटरग्लोब एव्हिएशन म्हणजेच इंडिगोचा शेअर तब्बल ४.०३ टक्क्यांनी घसरून ₹५,२५६ वर गेला.
ही सगळी घसरण केवळ एका बातमीमुळे झाली. इस्रायलने इराणवर हल्ला केला. माध्यमांनुसार, डझनभर लष्करी आणि अणुसंबंधित ठिकाणांवर आक्रमण झाले. यामुळे संपूर्ण तेलसंपन्न प्रदेशात अस्थिरता वाढली. विश्लेषकांच्या म्हणण्यानुसार, इराण जर उत्तरादाखल होर्मुझ सामुद्रधुनी बंद करण्याचा प्रयत्न करेल तर दररोज २० दशलक्ष बॅरल तेलाची वाहतूक अडचणीत येऊ शकते.
या पार्श्वभूमीवर जेपी मॉर्गनचा अंदाजही धक्कादायक होता. त्यांनी एका ताज्या अहवालात म्हटलंय की अत्यंत गंभीर परिस्थितीत तेलाची किंमत प्रति बॅरल १३० डॉलरपर्यंत जाऊ शकते. त्यांच्या मते, इराणकडून होणाऱ्या २.१ दशलक्ष बॅरलच्या निर्यातीवर परिणाम झाला, तर जागतिक पुरवठा तुटवड्याच्या उंबरठ्यावर येईल.
