दुधात जर एखादी छोटीशी वेलची टाकली, तर ती केवळ चवच नव्हे तर आरोग्यालाही लाभदायक ठरते. आपल्या स्वयंपाकघरात सहज उपलब्ध असलेली ही हिरवी वेलची, जी आपण बहुतेकवेळा फक्त चहा वा गोडधोड पदार्थांमध्ये वापरतो, ती जर रात्रीच्या दुधात घालून प्यायली, तर तिचा प्रभाव चक्क अमृतासारखा असतो.
सध्या अपचन, झोपेचा त्रास, तणाव, हाडांचा कमजोरपणा आणि रक्तदाब अशा अनेक समस्या आजच्या जीवनशैलीत सामान्य बनल्या आहेत. पण यावर उपाय म्हणून कोणत्याही औषधाऐवजी जर एखादा नैसर्गिक आणि घरगुती उपाय मिळाला, तर तो अधिक विश्वासार्ह आणि सुरक्षित ठरतो. अशाच उपायांपैकी एक म्हणजे रात्री झोपण्यापूर्वी वेलचीचं दूध पिणं.
अपचन आणि अ‍ॅसिडिटी
वेलचीमध्ये अँटीऑक्सिडंट्स, मॅग्नेशियम आणि कॅल्शियम यांसारखी पोषक तत्वं असतात, जी शरीराच्या विविध क्रियांमध्ये महत्त्वाची भूमिका बजावतात. जेव्हा ही वेलची गरम दुधात मिसळते, तेव्हा ती शरीरासाठी एक उर्जादायी आणि उपचारात्मक पेय बनतं. या पेयाचा पहिला मोठा फायदा म्हणजे अपचन आणि अ‍ॅसिडिटीवर नियंत्रण. जे लोक सतत जळजळ, गॅस, किंवा पचनासंबंधी त्रासांनी ग्रस्त असतात, त्यांच्यासाठी हे दूध अत्यंत लाभदायक ठरू शकतं.
रोगप्रतिकारक शक्ती
शिवाय, वेलचीचं दूध रोगप्रतिकारक शक्ती वाढवण्यातही मदत करतं. सतत सर्दी-खोकल्याने त्रस्त असलेल्या लोकांनी हे दूध नियमित पिणं सुरू केलं, तर शरीर अधिक मजबूत होऊन संक्रमणांना सामोरे जाण्याची ताकद मिळते.
हाडांच्या आरोग्याबाबतही वेलचीचं दूध महत्त्वाचं ठरतं. यामध्ये असलेलं कॅल्शियम हाडांची घनता टिकवून ठेवतं आणि वृद्धापकाळात होणाऱ्या अस्थिसंस्थेच्या समस्यांपासून दूर ठेवतं.
तणाव कमी करतो
तणाव कमी करणं ही या दूधाची अजून एक लक्षणीय वैशिष्ट्य आहे. कामाचा ताण, चिंता, किंवा थकवा यामुळे झोपेचा त्रास जाणवतो, पण वेलचीमध्ये असलेले अँटीऑक्सिडंट घटक मनाला शांत करतात आणि मेंदूला विश्रांती मिळवून देतात. त्यामुळे झोपही अधिक गाढ आणि शांत लागते.
रक्तदाब संतुलित राहतो
उच्च रक्तदाबाचे रुग्णसुद्धा वेलचीच्या दुधाचा फायदा घेऊ शकतात, कारण वेलचीमध्ये मॅग्नेशियम भरपूर असतं, जे रक्तदाब संतुलित ठेवण्यास मदत करतं.
एकंदर पाहता, वेलचीचं दूध म्हणजे आपल्या शरीरासाठी एक संपूर्ण पोषणदायक आणि आरोग्यवर्धक पेय आहे. हे फक्त चवीलाच नाही, तर आरोग्यासाठीही एक उत्तम साथीदार आहे. रात्रीच्या झोपेपूर्वी एक उबदार कप वेलचीचं दूध प्यायल्यास शरीर आणि मन दोन्ही ताजेतवाने होतात.
