खवय्यांना चिकन म्हटलं की जिभेला पाणी सुटतं! खरं तर अनेक जणांना त्याची चव, त्यातून येणारा रस आणि कुरकुरीतपणा फारच प्रिय असतो. पण जसं म्हणतात, ‘जे आवडतं ते नेहमी चांगलंच असेल असं नाही’, अगदी तसंच काहीसं चिकनच्या एका खास भागाबाबतही आहे आणि तो म्हणजे त्याची त्वचा. दिसायला सोनेरी, खवखवीत आणि तोंडाला पाणी आणणारी ही त्वचा, आपल्या आरोग्यासाठी मात्र एक मोठा धोका बनू शकते.
चिकन ही काही फक्त एक खाद्यपदार्थाची गोष्ट नाही; ती आपल्या जेवणातलं एक आनंददायक अनुभव आहे. कोणतीही खास पार्टी, रविवारीचं जेवण, किंवा मैत्रिणींचं गेट-टुगेदर चिकनशिवाय अधुरं वाटतं. त्यात प्रथिने भरपूर असल्यानं, ते अनेकांच्या दैनंदिन आहाराचा भागही बनलंय. पण या सगळ्या चविष्ट थाटामाटाच्या मागे एक महत्त्वाचं वास्तव दडलेलं आहे चिकनची त्वचा ही शरीरासाठी अत्यंत हानिकारक ठरू शकते.
जरा विचार करा आपल्याला नेहमी जी त्वचा कुरकुरीत करून खायला आवडते, ती त्वचा म्हणजे भरपूर चरबीचा साठा असतो. तळल्यानंतर ती अजूनच तुपकट होते, आणि त्यामुळे शरीरात साचत जातो अनावश्यक फॅट.
हळूहळू हा फॅट कोलेस्ट्रॉलचं रूप घेतो, हृदयावर दडपण वाढवत जातो, आणि मग सुरू होतो आजारांचा खेळ. फक्त वजन वाढणं नव्हे, तर उच्च रक्तदाब, हृदयरोग, आणि काही वेळा तर संसर्ग होण्याची शक्यता सुद्धा वाढते.
चिकनची त्वचा हा कोंबडीचा बाहेरचा भाग असल्यामुळे ती अनेक वेळा घाण, धूळ, बॅक्टेरिया आणि केमिकल्सच्या संपर्कात येते. कोंबड्यांना दिल्या जाणाऱ्या अँटीबायोटिक्सचे अंशही त्वचेतच जमा होतात. ते जर आपल्या शरीरात गेले, तर त्याचा परिणाम आपल्या प्रतिकारशक्तीवर होतो, आणि आपल्याला लवकर आजारी पडण्याचा धोका निर्माण होतो.
म्हणूनच जेव्हा पुढच्यावेळी चिकनच्या पानात हात घालाल, तेव्हा एक क्षण थांबा आणि विचार करा या कुरकुरीत पण धोकादायक त्वचेमुळे तुमचं आरोग्य कशा अडचणीत सापडू शकतं.
आता ह्या सर्वावर सोपा उपाय आहे चिकन शिजवण्याआधी त्याची त्वचा बाजूला काढा. चव कमी होईल असं वाटेल सुरुवातीला, पण शरीराला दिलेली ही छोटीशी काळजी भविष्यात मोठं स्वास्थ्याचं भांडार उघडू शकते.
