सूर्यास्त ही वास्तुशास्त्राच्या दृष्टीने एक अशी वेळ आहे, जिथे आपल्या वागण्या-बोलण्यावर आणि कृतींवर अधिक भान ठेवणं आवश्यक असतं. हिंदू परंपरेनुसार संध्याकाळ म्हणजे दिव्यता आणि श्रद्धेची वेळ , माता लक्ष्मीचे स्वागत करण्याची वेळ. मात्र, याच वेळी काही गोष्टी जर आपण अज्ञानाने किंवा गाफीलपणाने केल्या, तर त्या आपल्या जीवनावर आर्थिक आणि मानसिकदृष्ट्या नकारात्मक प्रभाव टाकू शकतात.
सूर्यास्तानंतर झाडू मारणे
वास्तुशास्त्रात काही कामांना संध्याकाळी अशुभ मानलं गेलं आहे. त्यामागचं कारण म्हणजे सूर्यास्तानंतर वातावरणात सकारात्मक ऊर्जेची जागा नकारात्मकतेने घेतलेली असते. त्यामुळे यावेळी केलेली चुकीची कृती ही आपल्यासाठी नुकसानकारक ठरू शकते. उदाहरणार्थ, झाडू मारणे जे अनेक घरांमध्ये संध्याकाळच्या स्वच्छतेचा भाग म्हणून केलं जातं. पण वास्तुशास्त्राच्या मते, सूर्यास्तानंतर झाडू मारल्याने लक्ष्मीचा अपमान होतो आणि त्यामुळे घरातून संपत्तीचे आशीर्वाद निघून जातात.
मुख्य दरवाजा बंद ठेऊ नका
तसेच, या काळात घराचा मुख्य दरवाजा सतत बंद ठेवणंही टाळावं. संध्याकाळ ही लक्ष्मीच्या आगमनाची वेळ मानली जाते. जर मुख्य दरवाजा बंद असेल, तर अशी धारणा आहे की लक्ष्मी देवी घरात प्रवेश न करता परत जातात. त्यामुळे काही वेळ दरवाजा खुला ठेवून, दिवा लावून आणि सकारात्मक वातावरण तयार करून देवीचं स्वागत करणं महत्त्वाचं आहे.
सूर्यास्तानंतर झोपू नका
वास्तुशास्त्र झोपेबाबतही सूचित करतं की सूर्यास्ताच्या वेळी किंवा त्यानंतर लगेच झोपू नये. ही वेळ धार्मिक आणि मानसिक शांतीसाठी उपयुक्त मानली गेली आहे. त्यामुळे संध्याकाळी झोपणं ही आळस आणि आर्थिक स्थैर्याच्या विरोधात जाणारी कृती मानली जाते.
दानधर्म
दानधर्मासारख्या पुण्यकार्यात संध्याकाळी विशिष्ट वस्तूंचं दान टाळावं.उदाहरणार्थ, मीठ, हळद, पैसे किंवा दही. या वस्तूंना लक्ष्मीशी संबंधित मानलं गेलं असून, संध्याकाळी त्यांचं दान केल्याने लक्ष्मी नाराज होते, असं समजलं जातं. याच वेळेस कांदा, लसूण, सुईसारख्या वस्तू घराबाहेर टाकणंही टाळावं, कारण यामुळे घरात नकारात्मक ऊर्जा वाढू शकते.
केस आणि नखं कापू नये
शेवटी, केस आणि नखं कापण्याबाबतही वास्तुशास्त्र स्पष्ट सांगतं, सूर्यास्तानंतर हे टाळावं. ही क्रिया केवळ अशुभ नाही तर त्या वेळेस केलेली शारीरिक निगा देखील मानसिक अस्थिरता निर्माण करू शकते, असं मानलं जातं.
