घरात निसर्गाचं वास्तव्य असेल तर तिथं केवळ सौंदर्यच नाही, तर सकारात्मता आणि समृद्धीची चाहूलही सतत जाणवत राहते. अनेकांच्या मते रोपं केवळ सजावटीपुरती असतात, पण वास्तुशास्त्र आपल्याला सांगतं की काही विशिष्ट वनस्पती घरात लावल्यास केवळ वातावरण शुद्ध राहत नाही, तर पैशांची चणचणही दूर होते आणि यशाचे दरवाजे उघडले जातात.
तसं पाहायला गेलं तर आपल्या आयुष्यात सुसंवाद, शांतता, आणि आर्थिक स्थैर्य या गोष्टींची कायमच गरज असते. पण जेव्हा घराच्या वास्तुशास्त्राशी सुसंगत अशा वनस्पतींचा आधार घेतला जातो, तेव्हा त्या फक्त सौंदर्यवर्धन ठरत नाहीत, तर घरात सौख्य, समाधान आणि यशाचं वलय निर्माण करतात. अशाच काही खास वनस्पती आहेत ज्या अनेक पिढ्यांपासून शुभ मानल्या जातात.
तुळशी
तुळशी हे भारतीय संस्कृतीचं एक अतूट अंग आहे. केवळ औषधी गुणधर्मांमुळेच नव्हे, तर अध्यात्मिकदृष्ट्याही तिचं स्थान फार महत्त्वाचं मानलं जातं. रोज सकाळी किंवा संध्याकाळी तुळशीपूजन केल्याने घरातील नकारात्मक ऊर्जा दूर होते असं मानलं जातं. म्हणूनच तुळशीचं रोप पूर्व किंवा ईशान्य दिशेला लावणं खूपच शुभ ठरतं.
मनी प्लांट
मनी प्लांट ही आणखी एक वनस्पती आहे जी घरात समृद्धी घेऊन येते, असं वास्तुशास्त्र सांगतं. त्याचं नावच सुचवतं की ते धनदायिनी आहे. जर हे रोप घराच्या आग्नेय दिशेला लावलं, तर आर्थिक उन्नतीचा मार्ग अधिक खुला होतो.
जेड प्लांट
त्याचप्रमाणे, जेड प्लांट ज्याला क्रॅसुला नावानेही ओळखलं जातं. हे एक अशा प्रकारचं रोप आहे जे सुख-समृद्धी खेचून आणतं, अशी मान्यता आहे. या रोपाचा पोत आणि हिरवळ लक्ष वेधून घेणारी असतेच, पण त्याच्या उपस्थितीने घरात आर्थिक स्थैर्य आणि सौभाग्यही येतं. ते उत्तरेस, पूर्वेस किंवा आग्नेय दिशेला ठेवणं सर्वोत्तम मानलं जातं.
ब्राझिलियन लकी वुड
ब्राझिलियन लकी वुड ही एक दुर्मीळ पण अत्यंत शुभ मानली जाणारी वनस्पती आहे. तिचं नाव ऐकताच तिच्या प्रभावाची कल्पना येते. तिच्या उपस्थितीने घरात सकारात्मक विचारांची वृद्धी होते आणि मानसिक शांततेचा अनुभव येतो. ही वनस्पती पूर्व किंवा आग्नेय दिशेला ठेवल्यास तिचा प्रभाव अधिक वृद्धिंगत होतो, असं वास्तुशास्त्र सांगतं.
एकूणच पाहता, निसर्गाशी नातं दृढ करायचं असेल आणि आयुष्यात यश, आनंद आणि आर्थिक स्थैर्य अनुभवायचं असेल, तर या वनस्पतींचा आधार घ्यावा.
