जर तुम्हाला सकाळी उठल्यावर गरमागरम कॉफीचा मग हातात घेणं आवडत असेल, तर तुमच्यासाठी एक आनंदाची बातमी आहे. कारण ही सवय तुम्हाला दीर्घायुष्य देण्यासही मदत करू शकते.शास्त्रीय संशोधनाच्या आधारावर हे आता सिद्ध होत आहे की कॉफी म्हणजे फक्त एक पेय नाही, तर ती आरोग्याच्या दृष्टीने एक उपयुक्त साथी आहे.
काय आहे नवीन संशोधन?
यूकेमधील ‘क्वीन मेरी युनिव्हर्सिटी ऑफ लंडन’च्या वैज्ञानिकांनी अलीकडेच एक अभ्यास केला, ज्यात त्यांनी कॉफीमध्ये आढळणाऱ्या कॅफिनचा शरीरावर होणाऱ्या परिणामांची सखोल तपासणी केली. विशेष म्हणजे, हा अभ्यास एका बुरशीपासून माणसांपर्यंतच्या पेशींवर केंद्रित होता, आणि यातून असा निष्कर्ष निघाला की कॅफिन पेशींमधील एक जुनी पण महत्त्वाची प्रणाली सक्रिय करतं, ज्याला AMPK असं नाव आहे. ही प्रणाली पेशींच्या उर्जेच्या व्यवस्थापनासाठी अत्यंत आवश्यक मानली जाते.
जेव्हा शरीरातील पेशींमध्ये उर्जेची कमतरता निर्माण होते, तेव्हा ही प्रणाली आपोआप सुरू होते आणि पेशींना दुरुस्त करण्यात, तणावाचा सामना करण्यात आणि वृद्धत्वाच्या प्रक्रियेला थांबवण्यात मदत करते. हीच AMPK नावाची यंत्रणा मधुमेहासाठी वापरल्या जाणाऱ्या ‘मेटफॉर्मिन’ या औषधावरदेखील परिणाम करते. त्यामुळे वैज्ञानिक आता याच प्रणालीचा वापर करून वृद्धत्वाशी संबंधित आजारांवर प्रभावी उपचार शोधण्याचा प्रयत्न करत आहेत.
कॉफी पिण्याचे फायदे
हे संशोधन केवळ पेशींच्या पातळीवर मर्यादित नाही. संशोधकांनी असेही स्पष्ट केले की, कॅफिन पेशींची वाढ, डीएनए दुरुस्ती आणि पेशींना तणावाशी लढण्याची क्षमता यामध्ये थेट सकारात्मक भूमिका बजावते. या सगळ्याचा एकत्रित परिणाम म्हणजे निरोगी आयुष्य, आजारांपासून संरक्षण आणि नैसर्गिक वृद्धत्वाची गती मंदावणे.
या अभ्यासाचे नेतृत्व करणारे डॉ. जॉन-पॅट्रिक अलाओ यांनी सांगितले की, या निष्कर्षांमुळे आता आपण कॅफिनचा वापर केवळ एक सकाळचा सवयीचा भाग म्हणून न पाहता, आरोग्यवर्धक उपाय म्हणूनही पाहू शकतो. भविष्यात, अशी अन्नपदार्थ किंवा औषधं विकसित होऊ शकतात जी याच प्रणालीचा वापर करून आरोग्य सुधारण्याचं काम करतील.
