रात्री झोपताना जर पायांचे सांधे दुखत असतील, जळजळ होत असेल किंवा एक विचित्र जडपणा जाणवत असेल, तर तो काही साधासुधा थकवा नाही. अनेक वेळा शरीर अशा प्रकारच्या वेदनांद्वारे आपल्या आतल्या गंभीर बिघाडांचा इशारा देत असते. त्यातील एक महत्त्वाचे कारण म्हणजे शरीरात वाढलेले युरिक अॅसिड.
आपल्या शरीरात दररोज विविध पेशींचे विघटन होते, आणि त्या प्रक्रियेमध्ये युरिक अॅसिड निर्माण होते. जेव्हा हे अॅसिड शरीरातून योग्य प्रकारे बाहेर निघत नाही, तेव्हा ते सांध्यांमध्ये साचून राहते आणि त्याचे क्रिस्टल्स तयार होतात. या क्रिस्टल्समुळे सूज, जळजळ आणि तीव्र वेदना होतात विशेषतः रात्री, जेव्हा शरीर विश्रांतीत असते आणि हालचाल कमी असते.
घोटे किंवा गुडघे दुखणे
अनेकांना जाणवणारे सामान्य लक्षण म्हणजे बोटांचे सांधे, घोटे किंवा गुडघे हे सकाळी उठल्यावर कडक झालेले वाटतात. चालताना जरा अडचण होते, आणि पायांमध्ये एक प्रकारचा थकवा जाणवतो. हे लक्षण सुरुवातीला दुर्लक्षित केले जाते, पण त्यातूनच एक गंभीर स्थिती तयार होत जाते. काही लोकांच्या पायांमध्ये थोडा स्पर्श झाल्यावरही वेदना वाढते, हे युरिक अॅसिड क्रिस्टल्सने सांधेमध्ये झालेल्या सूजेमुळे होते.
वारंवार लघवीला लागणे
युरिक अॅसिड वाढले असल्याचे आणखी एक सूचक लक्षण म्हणजे रात्री वारंवार लघवीला लागणे. शरीर स्वतःच या अॅसिडला बाहेर टाकण्याचा प्रयत्न करत असते. पण पाण्याचे प्रमाण कमी असेल तर, लघवीचा रंग गडद होतो, त्यातून दुर्गंध येतो हे युरिक अॅसिड अधिक प्रमाणात असल्याचे लक्षण.
सांध्यांवर सौम्य लालसरपणा
सांध्यांवर सौम्य लालसरपणा आणि उष्णता जाणवणे देखील युरिक अॅसिडमुळे होणाऱ्या दाहाचे लक्षण असू शकते. काही लोकांना या अवस्थेमध्ये सौम्य तापही येतो विशेषतः रात्री. स्नायूंमध्ये थकवा जाणवतो, शरीर जड वाटते आणि सकाळी उठल्यावर उत्साहाचाही अभाव जाणवतो.
सर्वात त्रासदायक गोष्ट म्हणजे घोट्यांमध्ये आणि पायांमध्ये सूज येणे. यामुळे रात्री झोप लागणं कठीण होतं, पाय हलवले तरी वेदना जाणवते आणि रोजच्या जीवनात एक अस्वस्थता सतत जाणवत राहते.
जर तुम्हाला या लक्षणांपैकी काही जाणवत असेल, तर युरिक अॅसिडची पातळी तपासणे गरजेचे आहे. सुरुवातीलाच योग्य काळजी घेतली, तर संधिवात किंवा इतर गंभीर स्थितींपासून वाचता येऊ शकते.
