आपण ऑफिसमध्ये यशस्वी होण्यासाठी कितीही मेहनत केली तरी काही वेळा अडथळे येतातच. यामागे फक्त मेहनतच नाही, तर आपल्याभोवती असणाऱ्या ऊर्जेच्या प्रवाहाचाही प्रभाव पडतो. वास्तुशास्त्राच्या दृष्टीने पाहिलं तर काही गोष्टी ऑफिस बॅगमध्ये ठेवणं फक्त चुकीचं नाही, तर तुमच्या करिअरला थेट नुकसान पोहोचवू शकतं.
आजच्या धकाधकीच्या जगात आपली बॅग म्हणजे एक छोटं जग असतं, मोबाइल चार्जरपासून ते लंच बॉक्सपर्यंत सगळं तिथंच असतं. पण त्याच बॅगमध्ये काही चुकीच्या गोष्टी गेल्या तर त्या तुमचं भाग्यसुद्धा फिरवू शकतात, असं वास्तुशास्त्र सांगतं.
घाणेरडे कपडे
वास्तुशास्त्रानुसार, बॅगमध्ये अस्वच्छ कपडे किंवा वापरलेले टॉवेल ठेवल्यास बॅगमध्ये नकारात्मक ऊर्जा स्थिरावते. हे मानसिक थकवा, चिडचिड आणि कार्यक्षमतेत घट घडवू शकते.
नेल कटर
त्याचप्रमाणे, काही लोक बॅगमध्ये चाकू, नेल कटर यांसारख्या वस्तू ठेवतात आणि सहजपणे विसरून जातात की ऑफिस बॅग ही व्यक्तिगत नव्हे तर व्यावसायिक गरजांची जागा आहे. या प्रकारच्या वस्तू बॅगमध्ये असणं ऑफिसमधील प्रतिमा आणि संबंधांवर विपरीत परिणाम करू शकते.
मेकअपचे सामान
विशेषतः महिलांच्या बाबतीत, अनेकजणी मेकअपचे सामान किंवा सौंदर्य प्रसाधने बॅगमध्ये ठेवतात. पण वास्तुशास्त्रानुसार, शुक्र ग्रहाशी संबंधित वस्तू (जसे की मेकअप) ऑफिस बॅगमध्ये असल्यास बुध व मंगळ ग्रहाशी जुळणाऱ्या वातावरणाला विरोध होतो. यामुळे निर्णय क्षमता आणि फोकसवर परिणाम होतो.यामुळे निर्णयक्षमता कमकुवत होते, कामात मन लागत नाही आणि अनेकदा महत्त्वाची संधी हातून निघून जाते.
परफ्यूम
तसेच, डिओडोरंट, परफ्यूम यांसारख्या सुगंधी गोष्टी बॅगमध्ये असणं अनेकांना सोयीचं वाटतं, पण वास्तुशास्त्रात त्यालाही स्थान नाही. या सुगंधामुळे मन अस्थिर होतं आणि लक्ष विचलित होतं, ज्यामुळे कामाची गुणवत्ता आणि वेग दोन्हीवर परिणाम होतो.
टूथब्रश, कंगवा
काही लोक तर टूथब्रश, कंगवा, वैयक्तिक स्वच्छतेच्या वस्तूंना देखील बॅगमध्ये जागा देतात. पण ही सवय नकारात्मक ऊर्जा निर्माण करते आणि कामामध्ये सातत्य टिकत नाही, असं वास्तुशास्त्र ठामपणे सांगतं.
फाटलेल्या नोटा
सर्वात महत्त्वाची बाब म्हणजे फाटलेल्या नोटा, जुन्या पावत्या किंवा अनावश्यक कागदपत्रं या गोष्टी फक्त जागा व्यापत नाहीत, तर त्या तुमच्या जीवनात आर्थिक अडथळे आणि मानसिक तणाव घेऊन येतात. आपल्या बॅगेतील अव्यवस्था आपल्या मनाच्या अव्यवस्थेचं प्रतिबिंब ठरते.
म्हणूनच, जर तुमचं ध्येय यश, पदोन्नती आणि मानसिक स्थैर्य असेल तर ऑफिस बॅग ही केवळ वस्तू ठेवायची जागा नव्हे, तर ती तुमच्या ऊर्जा क्षेत्राचा भाग आहे हे लक्षात ठेवा. वेळोवेळी बॅगमधील अनावश्यक गोष्टी काढा आणि केवळ आवश्यक, सुसंगत वस्तूंनाच जागा द्या.
