तुमच्या पीएफ खात्यात किती पैसे आहेत हे जाणून घेण्यासाठी नेहमी इंटरनेट लागेल असं नाही. आता तुम्ही अगदी 20 सेकंदात, तेही मोबाईल डाटाशिवाय, तुमचा पीएफ बॅलन्स सहज तपासू शकता. काही साध्या पर्यायांनी जसे की मिस्ड कॉल, एसएमएस आणि अगदी WhatsApp च्या साहाय्याने हे काम शक्य झालं आहे.
बरेचदा आपण ग्रामीण भागात असतो किंवा मोबाईलमध्ये इंटरनेट चालू नसेल, अशा वेळी अचानक पीएफ बॅलन्स तपासायची गरज भासते. अशा वेळी ही पद्धत खूप उपयोगी पडते. भारतातल्या कोट्यवधी कामगारांसाठी हे एक महत्त्वाचं अपडेट आहे, विशेषतः ज्या लोकांना स्मार्टफोन किंवा इंटरनेटशी फारसा संबंध नाही.
एसएमएस पद्धत
सर्वात सोपी पद्धत म्हणजे एसएमएस. तुमच्या मोबाईलवरून EPFOHO UAN HIN असा मेसेज तुम्ही 7738299899 या क्रमांकावर पाठवला, की काही सेकंदात तुमच्या खात्यात किती पीएफ आहे याची माहिती तुमच्या फोनवर येते. इथे ‘UAN’ म्हणजे युनिव्हर्सल अकाउंट नंबर आणि ‘HIN’ म्हणजे भाषा (हिंदीसाठी). ही सेवा मराठीसह 10 पेक्षा जास्त भाषांमध्ये उपलब्ध आहे. एक अट लक्षात ठेवा, तुमचा मोबाईल क्रमांक EPFO मध्ये रजिस्टर असणं गरजेचं आहे.
मिस्ड कॉल पद्धत
दुसरी पद्धत म्हणजे मिस्ड कॉल. तुम्ही 9966044425 या नंबरवर एक मिस्ड कॉल द्या. कॉल आपोआप डिस्कनेक्ट होईल आणि काही सेकंदात तुमच्या मोबाईलवर एसएमएसद्वारे पीएफ बॅलन्स मिळेल. यासाठीही मोबाईल नंबर रजिस्टर असावा आणि UAN अॅक्टिव्ह असावा.
WhatsApp पद्धत
तिसरी आणि आधुनिक पद्धत म्हणजे WhatsApp. EPFO ने आता WhatsApp आधारित सेवा सुरू केली आहे. तुम्हाला तुमच्या स्थानिक EPFO कार्यालयाचा WhatsApp नंबर सेव्ह करायचा आहे. त्यावर “Hi” किंवा “PF Balance” असा मेसेज टाका. लगेचच पीएफ बॅलन्सची माहिती रिप्लायमध्ये येईल. प्रादेशिक नंबर शोधण्यासाठी तुम्ही epfindia.gov.in या अधिकृत वेबसाइटला भेट देऊ शकता.
