पोस्ट ऑफिसद्वारे चालवल्या जाणाऱ्या बचत योजनांमधून लोकांना केवळ सुरक्षित गुंतवणूकच मिळत नाही, तर त्या योजनांमध्ये हमीदार व्याज आणि निश्चित परतावाही दिला जातो. विशेष म्हणजे या योजना कोणत्याही वर्गातील व्यक्तींसाठी उपयुक्त आहेत. मग तो सामान्य बचत करणारा असो, निवृत्त व्यक्ती असो, की मुलीच्या भविष्यासाठी पैसा साठवणारे पालक. या योजना दीर्घकाळात आर्थिक स्थैर्य निर्माण करतात आणि थोडीशी शिस्तबद्ध गुंतवणूक लाखोंचा भांडवली निधी तयार करण्यास मदत करते.
पोस्ट ऑफिस बचत खाते
पोस्ट ऑफिस बचत खाते हे सर्वात सोपे आणि पारंपरिक माध्यम आहे. फक्त ₹500 मध्ये उघडता येणारे हे खाते 4% वार्षिक व्याज देते. यामध्ये कमाल गुंतवणुकीवर कोणतीही मर्यादा नाही, त्यामुळे सामान्य बचतीसाठी हे आदर्श माध्यम आहे.
आवर्ती ठेव योजना
जर तुम्ही नियमितपणे पैसे बाजूला ठेवू शकत असाल, तर आवर्ती ठेव योजना तुमच्यासाठी उत्तम पर्याय आहे. फक्त ₹1,000 पासून सुरू करून तुम्ही दरमहा निश्चित रक्कम जमा करू शकता. सध्या 6.9% ते 7.5% व्याज दिले जाते आणि 5 वर्षांची मुदत पूर्ण केल्यावर चांगला परतावा मिळतो.
किसान विकास पत्र
या योजनेत गुंतवलेली रक्कम 9 वर्षे 10 महिन्यांमध्ये दुप्पट होते. सध्या यावर 7.5% व्याज दिले जाते. केवळ ₹1,000 पासून सुरुवात करून तुम्ही कोणतीही मोठी रक्कम गुंतवू शकता.
ज्येष्ठ नागरिक बचत योजना
60 वर्षांवरील नागरिकांसाठी ही योजना खास आहे. 5 वर्षांमध्ये 8.2% व्याज दिले जाते. यामध्ये 30 लाख रुपयांपर्यंत गुंतवणूक करता येते. हे खाते जोडप्यासाठीही फायदेशीर ठरते.
सुकन्या समृद्धी योजना
फक्त ₹250 पासून सुरुवात करून मुलीच्या नावावर हे खाते उघडता येते. सध्या या योजनेत 8.2% व्याज मिळते. ही योजना मुलीच्या शिक्षण आणि लग्नासाठी आर्थिक पाठबळ ठरते.
सार्वजनिक भविष्य निर्वाह निधी (PPF)
PPF योजना 15 वर्षांची असून, त्यात 7.1% व्याज मिळते आणि त्यावर करसवलतही मिळते. दरवर्षी ₹500 ते ₹1.5 लाख पर्यंत गुंतवणूक करता येते. ही योजना लांब पल्ल्याच्या गुंतवणुकीसाठी आदर्श मानली जाते.
मासिक उत्पन्न योजना
ही योजना खास अशांसाठी आहे जे दरमहा स्थिर उत्पन्न शोधतात. एकावेळी गुंतवणूक करून तुम्ही दरमहा व्याज स्वरूपात पैसे मिळवू शकता. यामध्ये एकटे खाते 9 लाखांपर्यंत आणि संयुक्त खाते 15 लाखांपर्यंत उघडता येते.
या सर्व योजना नोकरी करणारे तरुण, गृहिणी, निवृत्त व्यक्ती, मुलीच्या भविष्यासाठी विचार करणारे पालक आणि दरमहा थोडी बचत करू शकणारे सर्वसामान्य गुंतवणूकदार यांच्यासाठी बेस्ट आहेत.
