भारताच्या कसोटी क्रिकेट इतिहासात काही क्षण असे असतात जे चाहत्यांच्या हृदयात कायमचे कोरले जातात. अशाच एका ऐतिहासिक क्षणाची अनुभूती अलीकडेच क्रिकेटप्रेमींना मिळाली, जेव्हा शुभमन गिलने इंग्लंडविरुद्ध कसोटीत झळकावलेले दुहेरी शतक फक्त एक वैयक्तिक कामगिरी नव्हती, तर तो भारतीय क्रिकेटमधील एक नवीन अध्याय ठरला. गिलने 311 चेंडूत 21 चौकार आणि 2 षटकारांच्या सहाय्याने केलेल्या 269 धावांनी त्याला केवळ सामन्याचा हिरोच नव्हे, तर कसोटीत दुहेरी शतक ठोकणारा सहावा भारतीय कर्णधार बनवले.
मन्सूर अली खान पतौडी
भारतासाठी कसोटीत कर्णधार म्हणून दुहेरी शतक झळकावणे ही एक दुर्मीळ आणि मोठी गोष्ट मानली जाते. आजवर ही कामगिरी केवळ 6 जणांनाच जमली आहे आणि त्यातही विराट कोहली हा अपवाद ठरतो, ज्याने तब्बल 7 वेळा ही कामगिरी बजावली आहे. पण त्याआधी हा प्रवास सुरू झाला तो मन्सूर अली खान पतौडींपासून. 1964 मध्ये दिल्लीच्या मैदानावर इंग्लंडविरुद्ध नाबाद 203 धावा करत पतौडींनी ही परंपरा सुरू केली होती.
सुनील गावस्कर
यानंतर 1978 मध्ये सुनील गावस्कर यांनी मुंबईच्या वानखेडे स्टेडियमवर वेस्ट इंडिजविरुद्ध 342 चेंडूंमध्ये 205 धावांची खेळी साकारली. गावस्कर हे नाव भारतीय क्रिकेटमध्ये कायमच आदराने घेतले जाते आणि त्याच्या संयमी फलंदाजीने भारताला अनेक वेळा आधार दिला आहे.
सचिन तेंडुलकर
1999 मध्ये सचिन तेंडुलकरने न्यूझीलंडविरुद्ध अहमदाबाद कसोटीत 217 धावा करत आपल्या “महानतेची” एक वेगळी छाप सोडली. त्याचा हा खेळ केवळ फलंदाजीचा नमुना नव्हता, तर ती एक प्रेरणादायक कहाणी होती.
एमएस धोनी
2013 मध्ये एमएस धोनीने ऑस्ट्रेलियाविरुद्ध चेन्नई कसोटीत 224 धावांची फटकेबाजी करत एक वेगळाच ठसा उमटवला. त्याच्या नेतृत्वाखालील ही कामगिरी संघासाठीही निर्णायक ठरली होती.
विराट कोहली
पुढच्या काही वर्षांत, विराट कोहली या नावाने कसोटी क्रिकेटमध्ये धडाडीने पाऊल टाकलं. त्याने फक्त एक नाही, तर तब्बल 7 वेळा कर्णधार म्हणून कसोटीत दुहेरी शतक झळकावले. कोहलीच्या नावावर हे अद्वितीय विक्रम असून इतर कोणत्याही भारतीय कर्णधाराला हे साधता आलेलं नाही.
शुभमन गिल
आणि आता, शुभमन गिलने त्या यादीत आपलं नाव एका तेजस्वी आणि आत्मविश्वासपूर्ण कामगिरीच्या जोरावर कोरलं आहे. इंग्लंडमधील बर्मिंगहॅम कसोटीत पहिल्या डावात त्याने 269 धावा करत ना फक्त सामना ताब्यात घेतला, तर आशियाई कर्णधारांपैकी इंग्लंडमध्ये दुहेरी शतक करणारा पहिलाच खेळाडू ठरण्याचा मानही पटकावला.
