Pune Metro News : पुणे शहरातील मेट्रोचे जाळे आणखी विस्तारले जाणार आहे. महा मेट्रो कडून सुरू करण्यात आलेल्या पिंपरी चिंचवड महापालिका ते स्वारगेट आणि वनाज ते रामवाडी या मेट्रोमार्गानंतर पुण्याला आणखी एका नव्या मेट्रोमार्गाची भेट मिळणार आहे. मिळालेल्या माहितीनुसार पुणेरी मेट्रोचा पहिला टप्पा लवकरच सुरू केला जाणार आहे.
खरे तर पुणे महानगर प्रदेश विकास प्राधिकरणाच्या माध्यमातून पब्लिक प्रायव्हेट पार्टनरशिप तत्त्वावर शिवाजीनगर ते हिंजवडी दरम्यान मेट्रो मार्ग तयार केला जात आहे. दरम्यान आता याच मेट्रो मार्गाच्या संदर्भात एक मोठी माहिती समोर आली आहे. आतापर्यंत या मेट्रो मार्गाचे 87% काम पूर्ण झाले असून मार्च 2026 मध्ये या प्रकल्पाचे पूर्ण काम होईल असा अंदाज आहे.
मात्र त्याआधीच या मेट्रो मार्गाचा पहिला टप्पा सर्वसामान्यांसाठी खुला होण्याची शक्यता आहे. सप्टेंबर महिन्यात या मेट्रो मार्गाचा हिंजवडी ते बालेवाडी या दरम्यानचा कॉरिडॉर सर्वसामान्यांसाठी खुला होऊ शकतो अशी खात्रीलायक बातमी प्रतिष्ठित वृत्त संस्थेच्या माध्यमातून समोर आली आहे.
काय आहेत डिटेल्स ?
शिवाजीनगर ते हिंजवडी दरम्यान 23.3 किलोमीटर लांबीचा मेट्रो मार्ग विकसित केला जात आहे. या मेट्रो मार्गाचे काम पब्लिक प्रायव्हेट पार्टनरशिप तत्वावर केले जात आहे. पुणे महानगर प्रदेश विकास प्राधिकरणाकडे या प्रकल्पाच्या अंमलबजावणीची जबाबदारी आहे.
दरम्यान आता याच मेट्रो मार्गाचा 13 किलोमीटर लांबीचा एक टप्पा 3 सप्टेंबर 2025 रोजी सर्वसामान्यांसाठी खुला होईल अशी बातमी समोर येत आहे. पीएमआरडीए च्या अधिकाऱ्याने नाव न छापण्याच्या अटीवर ही माहिती दिली असल्याचा दावा मीडिया रिपोर्ट मध्ये करण्यात आला आहे.
या अंतर्गत हिंजवडी ते बालेवाडी म्हणजेच मेगापोलीस सर्कल आणि बालेवाडी फाटा या दोन मेट्रोस्थानाचा दरम्यानचा मार्ग पुणेकरांसाठी 3 सप्टेंबर रोजी खुला करण्याचे नियोजन आहे. हिंजवडी मधील वाढती वाहतूक कोंडी पाहता हा निर्णय घेतला जाईल असे म्हटले जात आहे.
खरंतर शिवाजीनगर हिंजवडी मेट्रो मार्गाचे काम नोव्हेंबर 2021 मध्ये सुरू झाली. याचे काम दोन फेज मध्ये केले जात आहे. आतापर्यंत या प्रकल्पाचे 87 टक्के काम पूर्ण झाले असून उर्वरित काम सुद्धा जलद गतीने सुरू आहे आणि त्यातच आता या मेट्रो मार्गाचा मेगापोलीस सर्कल आणि बालेवाडी फाटा दरम्यान चा मार्ग सर्वसामान्यांसाठी सप्टेंबर महिन्यात खुला होईल असे वृत्त हाती आले आहे.
पहिली ट्रायल रन झाली यशस्वी
गेल्या आठवड्यात, पीएमआरडीएने पुणेरी मेट्रोच्या मुख्य मार्गावर यशस्वीरित्या चाचणी घेतली आहे आणि प्रकल्पाच्या अंमलबजावणीतील हा एक महत्त्वाचा टप्पा समजला जात आहे. या मेट्रो मार्ग प्रकल्पाच्या पूर्वीच्या चाचण्या ह्या फक्त डेपोपुरत्या मर्यादित होत्या.
म्हणजे गेल्या आठवड्यात जी चाचणी झाली ती प्रत्यक्ष मार्गावरील पहिलीचं पूर्ण चाचणी होती. पीएमआरडीएचे आयुक्त योगेश म्हसे यांनी स्वतः ही माहिती दिली आहे. दरम्यान, या मार्गावरील चाचणी यशस्वी झाल्यामुळे या मार्गावरील ऑपरेशन्स टप्प्याटप्प्याने सुरू करण्याच्या दिशेने हे एक मोठे पाऊल असल्याचे म्हटले जात आहे.
सध्या मान ते बालेवाडी फाटा दरम्यानचा 13 किमी लांबीचा मार्ग हा बांधकामाच्या अंतिम टप्प्यात आहे. तसेच या मार्गावरील एकूण तेरा स्थानके संरचनात्मकदृष्ट्या पूर्ण झाली आहेत आणि जिने, फिनिशिंग आणि सुविधांचे काम सुद्धा युद्ध पातळीवर सुरू आहे. दरम्यान प्राधिकरणाकडून सप्टेंबर 2025 पर्यंत या मार्गावर मेट्रो सेवा सुरू करण्याचे ध्येय ठेवण्यात आले आहे.
या अनुषंगाने या टप्प्यातील उर्वरित कामे, ज्यामध्ये अंतर्गत कामे आणि सुरक्षा तपासणीचा समावेश आहे, ते पुढील काही आठवड्यात पूर्ण केले जाईल, अशी माहिती संबंधितांकडून समोर आली आहे. दरम्यान हा संपूर्ण मेट्रो मार्ग म्हणजे शिवाजीनगर ते हिंजवडी असा संपूर्ण मेट्रो मार्ग मार्च 2026 पर्यंत पूर्ण होईल असाही दावा प्राधिकरणाकडून करण्यात आला आहे.
