स्टेशनवर वेळेवर पोहोचूनही जर तुमची ट्रेन चुकली, तर तुम्ही काय कराल? घाबरून जाल? वैतागाल? की नशिबावर दोष टाकाल? पण या सगळ्याच्या पलीकडे एक गोष्ट आहे जी बहुतेक लोकांना माहितीच नसते. अशा परिस्थितीतही तुम्हाला रेल्वेकडून भरपाई मिळू शकते. उत्तर प्रदेशातल्या गाझियाबाद स्थानकावर घडलेली एक घटना याचं जिवंत उदाहरण आहे, जिथे एका प्रवाशाला ट्रेन चुकल्यामुळे न्यायालयाने रेल्वे प्रशासनावर दंड ठोठावला.
ही गोष्ट आहे मुरादनगरमधील रहिवासी अनुभव प्रजापती यांची, जे 29 फेब्रुवारी 2024 रोजी आपल्या पत्नी आणि मुलांसह झाशीला जाण्यासाठी छत्तीसगड एक्सप्रेसने गाझियाबाद स्थानकावर पोहोचले होते. ट्रेन पहाटे 3:20 वाजता प्लॅटफॉर्म क्रमांक 3 वरून सुटणार होती. अनुभव हे अगदी वेळेवर पोहोचले होते, पण काही काळात घोषणा झाली की ट्रेन 40 मिनिटे उशिरा आहे. इतकं समजून ते वाट पाहत राहिले.
गाझियाबाद स्थानकावरील अजब प्रसंग
पण पुढे जे घडलं, ते खरंच गोंधळात टाकणारं होतं. 3:25 वाजता जेव्हा अनुभव प्लॅटफॉर्मवर गेले, तेव्हा तिथे अयोध्या एक्सप्रेस उभी होती. ते वाट पाहत राहिले, पण छत्तीसगड एक्सप्रेससंबंधी कुठलीच घोषणा झाली नाही. स्टेशन मास्टरच्या रूमवर गेले, पण ती बंद होती. अखेर सकाळी 5:21 ला त्यांनी रेल्वे अधिकाऱ्यांना सोशल मीडियावर टॅग करून मदत मागितली, पण काहीही उत्तर मिळालं नाही.
सकाळी 6 च्या सुमारास त्यांनी ऐकलं की छत्तीसगड एक्सप्रेस प्लॅटफॉर्म क्रमांक 2 वरून निघून गेली आहे. त्यांच्या समोर अयोध्या एक्सप्रेस उभी होती, पण खरी ट्रेन वेगळ्याच प्लॅटफॉर्मवरून निघून गेली होती. आणि या सगळ्या गोंधळात रेल्वे प्रशासनाकडून कोणतीच योग्य माहिती मिळाली नाही. परिणामी, एक संपूर्ण कुटुंब आपल्या प्रवासापासून वंचित राहिलं.
कोर्टाकडून नुकसान भरपाईचे आदेश
अनुभव यांनी ही गोष्ट थेट जिल्हा ग्राहक न्यायालयात नेली. सुनावणीदरम्यान रेल्वे अधिकाऱ्यांनी स्पष्ट माहिती दिली नाही, आणि कोणतीही घोषणाही केल्याचे पुरावे सादर करू शकले नाहीत. रेल्वेचा वकील म्हणाला की ट्रेन फारशी उशिरा नव्हती, त्यामुळे परतफेड शक्य नाही. पण न्यायालयाने स्पष्ट केलं की इथे मुद्दा ट्रेनच्या वेळेचा नाही, तर घोषणांच्या अभावामुळे प्रवाशांना झालेल्या मानसिक त्रासाचा आहे.
23 जून रोजी न्यायालयाने आदेश दिला की स्टेशन अधीक्षक, स्टेशन मास्टर, विभागीय व्यवस्थापक आणि उत्तर रेल्वेचे महाव्यवस्थापक यांनी एकत्रितपणे 7,000 रुपयांची भरपाई 45 दिवसांच्या आत अनुभव प्रजापती यांना द्यावी.
उत्तर रेल्वेने सांगितले आहे की ते यासंदर्भात चौकशी करतील आणि ट्रेनची घोषणा केली होती की नाही याचा तपास केला जाईल. जर चुकीचे आढळले, तर संबंधित अधिकाऱ्यांवर कारवाई केली जाईल.
