जेऊर- अहिल्यानगर तालुक्यातील जेऊर परिसरात रोडरोमिओंच्या उपद्रवामुळे शिक्षण घेणाऱ्या विद्यार्थिनींच्या शिक्षणावरच प्रश्नचिन्ह निर्माण झाले आहे. रोड रोमिओंच्या वाढत्या उपद्रवामुळे पालक वर्गामध्ये चिंता निर्माण झाली असून रोडरोमीओंचा कायमस्वरूपी बंदोबस्त करण्याची मागणी पंचक्रोशीतील नागरीक, विद्यार्थिनी तसेच पालक वर्गामधून होत आहे.
जेऊर येथे महाविद्यालयीन शिक्षण घेण्यासाठी पंचक्रोशीतील विविध गावांमधून विद्यार्थी, विद्यार्थिनी शिक्षणासाठी येत असतात. इमामपूर, धनगरवाडी, ससेवाडी, डोंगरगण, पांढरीपुल, आढाववाडी, चापेवाडी, तोडमलवाडी, वांजोळी, खोसपुरी, बहिरवाडी तसेच विविध वाड्या वस्त्यांवरून विद्यार्थिनी मोठ्या संख्येने शिक्षण घेण्यासाठी जेऊर येथे येत असतात.
परंतु जेऊर परिसरात रोडरोमीओंचा उपद्रव दिवसेंदिवस वाढतच चालला आहे. त्यामुळे पालक वर्गांमध्ये देखील चिंतेचे वातावरण निर्माण झाले आहे. महाविद्यालय भरण्याच्या तसेच सुटण्याच्या वेळेस विद्यालयाच्या परिसरात तसेच रस्त्यांवर, विविध चौकांमध्ये रोडरोमिओ घोळक्याने बसलेले असतात. धूम स्टाईल दुचाकी चालवणे, कट मारणे, अश्लील हावभाव करणे, विद्यार्थिनींचा पाठलाग करणे असले प्रकार नित्याचेच झालेले आहेत. झालेला प्रकार विद्यार्थ्यांनी पालक अथवा शिक्षकांना सांगत नाहीत. तसेच तक्रार करत नसल्याने रोड रोमिओंचे फावत आहे. त्याचाच फायदा रोडरोमिओ घेत असल्याचे चित्र परिसरामध्ये दिसून येते.
पालकांकडून शिक्षण बंद होईल या भीतीपोटी विद्यार्थिनी झालेला प्रकार सांगत नाहीत. परिसरात रोडरोमीओंची दहशतही मोठ्या प्रमाणात वाढलेली आहे. दारूच्या नशेत तुर्र असणाऱ्या टपोरींकडे तर घातक हत्यारे देखील असल्याची चर्चा नागरिकांमध्ये आहे. यापूर्वी शिक्षकांना अरेरावी तसेच रोड रोमिओंमध्ये आपापसात हाणामाऱ्या झाल्याच्या घटना देखील घडलेल्या आहेत.
जेऊर परिसरातील विद्यालये तसेच खाजगी क्लासेसही रोडरोमीओच्या गराड्यात सापडल्याचे पहावयास मिळते. रोडरोमीओंच्या भीतीपोटी अनेक पालक काम सोडून विद्यार्थिनींना विद्यालयात नेण्यासाठी व सोडण्यासाठी स्वतः येत आहेत. त्यामुळे त्यांचा वेळ व पैसाही वाया जात आहे. परिसरातील विविध चौक, रस्ते रोड रोमिओंचे अड्डे बनले आहेत. यापूर्वी रोडरोमीओं बाबत पोलिसांकडे ग्रामपंचायत, ग्रामस्थ तसेच काही विद्यालयांनी तक्रार अर्ज देखील दिले होते.
तक्रार अर्जानंतर तात्पुरत्या स्वरूपात कारवाई करण्यात येते. परत रोडरोमीओंचा सुळसुळाट होतच असल्याचा आरोप नागरिक करत आहेत. काही पालकांनी तर विद्यार्थिनींचे शिक्षण बंद केल्याची धक्कादायक माहिती सुद्धा समोर येत आहे. जेऊर परिसरातील रोडरोमीओंवर तात्पुरत्या स्वरूपात कारवाई न करता त्यांचा कडक बंदोबस्त करण्याची गरज असल्याचे मत जेऊर पंचक्रोशीतील ग्रामस्थ व पालक व्यक्त करत आहेत.
अन्यथा घडू शकतो अनुचित प्रकार!
वाड्या वस्त्यांवरून सायकलवर तसेच पायी विद्यार्थिनी शिक्षणासाठी जेऊर येथे येत असतात. रस्ते सुनसान असतात अशावेळी विद्यार्थिनींचा पाठलाग करणाऱ्या रोड रोमीओंकडून भविष्यात अनुचित प्रकार घडण्याची ही शक्यता नाकारता येत नाही.
विद्यार्थिनींच्या शिक्षणाबाबत प्रश्नचिन्ह ?
पोलिसांनी शाळा, महाविद्यालय तसेच खाजगी क्लासेस परिसरामध्ये खाजगी गणवेशात गस्त घालून रोडरोमीओबाबत माहिती घ्यावी. रोडरोमीओंवर कडक कारवाई करावी. रोड रोमीओंच्या जाचापासून विद्यार्थिनी, पालक व ग्रामस्थांची सुटका करावी. अन्यथा पंचक्रोशीतील विद्यार्थिनींच्या शिक्षणावर प्रश्नचिन्ह उभे राहणार आहे. पालकांकडून विद्यार्थिनींचे शिक्षण बंद करण्याची भीती व्यक्त केली जात आहे.
जेऊर परिसरात अनेक वर्षांपासून रोड रोमिओंचा उपद्रव सुरू आहे. जेऊर मधीलच नव्हे तर परिसरातील वाड्या वस्त्यांवरून देखील रोडरोमिओ शाळा, महाविद्यालय तसेच खाजगी क्लासेस परिसरात घोंगावत आहेत. विद्यार्थिनींनी मोकळेपणाने शिक्षण घ्यावे यासाठी रोडरोमीओंवर कडक कारवाई करण्याची मागणी पंचक्रोशीतील ग्रामस्थ करत आहेत.
