Ahmedabad Air India Plane Crash : 12 जून 2025 रोजी एअर इंडियाचे विमान लंडनला जात असताना कोसळले. हा विमान अपघात एवढा भीषण होता की या विमानात असणारे 242 पैकी 241 प्रवाशांना आपला जीव गमवावा लागला. या अपघातात एकूण 260 लोकांचा जीव गेला. या भीषण विमान अपघातामुळे संपूर्ण जगात हळहळ व्यक्त करण्यात आली.
दरम्यान या भीषण विमान अपघाताचा गेल्या काही दिवसांपासून युद्ध पातळीवर तपास सुरू होता. भारताच्या विमान अपघात तपास ब्युरो कडून या अपघाताचा तपास सुरु होता आणि आता ब्युरो कडून नुकताच आपला प्राथमिक तपास अहवाल सादर करण्यात आला आहे.
दरम्यान हा प्राथमिक तपास अहवाल समोर आल्यानंतर आता एअर इंडिया कंपनीकडूनही या संदर्भात आपली भूमिका क्लियर करण्यात आली आहे. अशा परिस्थितीत आता आपण प्राथमिक तपास अहवाल समोर आल्यानंतर एअर इंडिया कंपनीने नेमके काय म्हटले आहे याबाबतची माहिती पाहणार आहोत.
तपास अहवाल काय सांगतो?
AAIB म्हणजे भारताच्या विमान अपघात तपास ब्युरोच्या प्राथमिक अहवालात असे सांगितले गेले आहे की, एअर इंडियाचे एआय 171 या विमानाने 12 जून 2025 रोजी अहमदाबाद विमानतळावरून उड्डाण घेतल्याच्या काही सेकंदानंतर लगेचच इंजिनला इंधन पुरवठा करणारे स्विचेस Run मोडवरून कटऑफ मोडवर गेले होते.
विमानाने उड्डाण घेतल्यानंतर अवघ्या काही सेकंदामध्येच इंजिन 1 आणि इंजिन 2 यांना इंधनपुरवठा करणारे स्विचेस बंद झालेत, यामुळे विमानाचे दोन्हीही इंजिन बंद पडले होते. दरम्यान आज 12 जुलै 2025 रोजी या तपास अहवालावर एअर इंडिया कंपनीने आज अधिकृत विधान केले आहे.
कंपनीने काय सांगितले ?
एअर इंडिया कंपनीने आपल्या अधिकृत एक्स हँडलवर एक पोस्ट लिहली आहे. ज्यात कंपनीने असे म्हटले आहे की, एअर इंडिया AI171 अपघातात बाधित झालेल्या कुटुंबीयांसोबत आणि इतर सर्व प्रभावितांसोबत आहे. या दु:खद प्रसंगी आम्ही त्यांच्या दुःखात सहभागी आहोत आणि सर्वतोपरी मदत करण्यासाठी सुद्धा वचनबद्ध आहोत.
दरम्यान, आज, 12 जुलै 2025 रोजी विमाने अपघात तपास संस्था (AAIB) यांनी प्रसिद्ध केलेल्या प्राथमिक अहवालाची आम्ही पावती देतो. तसेच एअर इंडिया नियामक यंत्रणा व इतर संबंधित घटकांशी जवळून समन्वय साधत आहे.
AAIB आणि अन्य अधिकृत संस्थांच्या तपास प्रक्रियेत आम्ही पूर्ण सहकार्य करत आहोत. तपास सुरू असल्यामुळे, आम्ही सध्या अपघाताशी संबंधित विशिष्ट तपशीलांवर भाष्य करू शकत नाही. म्हणून अशा सर्व चौकशींसाठी कृपया AAIB कडे संपर्क साधावा असे सुद्धा आवाहन एअर इंडिया कंपनीकडून यावेळी करण्यात आले आहे.
