जामखेड- सध्या जामखेड शहरात बंदूकीची धमकी देण्याचे प्रकार वाढतच चालले आहेत. तुला जर फळविक्रीचा व्यवसाय करायचा असेल तर आम्हाला पाचशे रुपये रोज दे, नाहीतर गोळ्या घालू अशी धमकी शहरातील एका फळविक्रीचा व्यवसाय करणाऱ्यास दिली. या प्रकरणी दोन जणांविरोधात जामखेड पोलीस स्टेशनला गुन्हा दाखल करण्यात आला आहे.
पोलिसांकडून मिळाले माहिती अशी की, दि.११ जुलै रोजी रात्री ८.३० वाजता जामखेड शहरातील संविधान चौक लक्ष्मीआई मंदिरांच्या समोर समीर महंमद बागवान हा नेहमी प्रमाणे फळविक्री करत होता. यावेळी त्या ठिकाणी सोनु वाघमारे (रा. आरोळेवस्ती जामखेड), आदम जलाल शेख (रा. फक्राबाद ता. जामखेड) हे दोघे आले व तुला जर फळविक्रीचा व्यवसाय करायचा असेल तर आम्हाला पाचशे रुपये रोज द्यावे लागतील असे म्हणून फिर्यादी समीर बागवान यास चापटीने गालात मारहाण केली. तसेच विक्रीसाठी आणलेले सफरचंदाचे नुकसान करुन तु जर आम्हाला न विचारता फळाचे दुकान लावले तर आमचेकडील बंदुकीने तुला गोळ्या घालू अशी धमकी दिली.
या प्रकरणी समीर बागवान यांच्या फिर्यादीवरुन सोनु वाघमारे व आदम जलाल शेख या दोघांवर जामखेड पोलीस स्टेशनला गुन्हा दाखल करण्यात आला आहे. या घटनेची माहिती मिळताच पोलीस निरीक्षक दशरथ चौधरी, पोसई गावडे यांनी घटनास्थळी भेट दिली. पुढील तपास पोस ई गावडे हे करत आहेत.
गुन्हेगारांच्या मुसक्या आवळा
सध्या जामखेड शहरासह तालुक्यात गुन्हेगारी चांगलीच वाढली आहे. यात धमकावणे, गुंडगिरी, दहशत पसरवणे, खाजगी सावकारकी, खंडणी मागणे असे प्रकार वारंवार वाढतच चालले आहेत. यात प्रामुख्याने अनेकदा बंदूकीचा वापर केला जात असल्याचे समोर आले आहे. पोलीस प्रशासनाने याची वेळीच दखल घेऊन संबंधित गुन्हेगारांच्या मुसक्या आवळण्याची गरज आहे.
