भारतीय लष्कराच्या तोफखाना शक्तीत लवकरच एक जबरदस्त क्रांती होणार आहे. आता सामान्य दारूगोळ्यांच्या मर्यादेपलीकडे जाऊन, भारत स्वतःचं अशा अत्याधुनिक शेल्सचं उत्पादन करत आहे जे फक्त नेमबाज नाहीत, तर इतकं अचूक आणि प्रचंड क्षमतेचं आहे की शत्रूवर क्षेपणास्त्रांसारखा मारा करतील. संरक्षण संशोधन आणि विकास संस्था म्हणजेच DRDO सध्या अशा शेल्सवर काम करत आहे जे GPS आणि लेसर-मार्गदर्शित तंत्रज्ञानाने सुसज्ज असतील. हे तंत्रज्ञान भारताच्या स्वतःच्या नेव्हिगेशन उपग्रह प्रणालीद्वारे नियंत्रित केलं जाईल, ज्यामुळे तोफखान्याच्या हल्ल्यांमध्ये अचूकता आणि दूरगामी क्षमता दोन्ही मिळणार आहेत.
ATAGS तोफ
सध्या भारतीय लष्करात वापरल्या जाणाऱ्या ATAGS म्हणजेच Advanced Towed Artillery Gun System ही तोफ सुमारे 48 किलोमीटरच्या परिसरात लक्ष्य भेदू शकते. पण आता DRDO जी नवीन स्मार्ट शेल्स तयार करत आहे, त्यांची रेंज थेट 80 किलोमीटरपर्यंत जाईल. म्हणजेच, युद्धभूमीवर लष्कराला जास्त सुरक्षित अंतरावरून भेदक हल्ला करण्याची ताकद मिळणार आहे. याच शेल्समुळे लढाईतला वेळ, संसाधनं आणि माणसांची जीवितहानी यावर नियंत्रण ठेवता येईल, हे या तंत्रज्ञानाचं मोठं यश ठरेल.
काय आहे ‘Ramjet’ तंत्रज्ञान?
यामध्ये आणखी एक महत्त्वाची बाब म्हणजे हे शेल्स पूर्णपणे भारतीय बनावटीचे असतील. DRDO च्या पुण्यातील ARDE म्हणजेच Armament Research and Development Establishment मधून हे विकसित केले जात आहेत. विशेष म्हणजे हे शेल्स केवळ GPS किंवा लेसरद्वारे निर्देशित असणार नाहीत, तर त्यात ‘Ramjet’ तंत्रज्ञान असलेलं कवच देखील तयार केलं जात आहे. रामजेट हे अशा प्रकारचं इंजिन आहे जे स्वतःच्या वेगाने हवेतून ऊर्जा घेतं आणि त्यामुळे शेल्स अधिक लांब अंतरावर अचूकपणे जाऊ शकतात.
या कवचांचा प्रोटोटाइप 2027 पर्यंत तयार होईल अशी अपेक्षा आहे. एकदा हे शस्त्रसज्जतेच्या अंतिम टप्प्यात पोहोचलं की, भारतीय तोफखान्याला एक अशी ताकद मिळेल जी आज फक्त काहीच देशांकडे आहे. विशेषतः रामजेट तंत्रज्ञानाचा वापर करणारी तोफखाना प्रणाली अत्यंत दुर्मिळ आहे आणि भारत त्यात सामील होण्याच्या तयारीत आहे.
₹6,900 कोटींचा करार
हे शेल्स केवळ ATAGS वरूनच डागता येणार नाहीत, तर 155 मिमीच्या इतर तोफा, जसं की धनुष, K9 वज्र किंवा हॉवित्झर FH-77 या सर्व प्रकारच्या तोफांवरून सुद्धा वापरता येतील. भारतीय लष्कराने आतापर्यंत सुमारे 307 ATAGS तोफा आणि 327 6×6 तोफवाहनं खरेदी करण्यासाठी ₹6,900 कोटींचा करार केला आहे. त्यातली पहिली रेजिमेंट 2027 च्या मार्चपर्यंत लष्करात दाखल होईल, ज्यात 18 तोफा असतील.
