कोपरगाव- गोदावरी कालव्यांना तातडीने ओव्हरफ्लोचे पाणी सोडावे, अशी मागणी आ. आशुतोष काळे यांनी जलसंपदा मंत्री राधाकृष्ण विखे पाटील यांच्याकडे केली होती. त्या मागणीची दखल घेवून सोमवारपासून गोदावरी डाव्या कालव्याला ओव्हरफ्लोचे पाणी सोडले असून उजव्या कालव्याला देखील लवकरच पाणी सोडणार असल्याची माहिती आ. काळे यांनी प्रसिद्धी पत्रकाद्वारे दिली आहे.
पावसाळा सुरु होवून दीड महिन्याचा कालावधी पूर्ण होत आला तरी अद्याप पर्यंत मतदारसंघात समाधानकारक पाऊस झालेला नाही. त्यामुळे अजूनही भूजलपातळी वाढलेली नाही. मात्र, मे महिन्यात पावसाने दिलेली जोरदार सलामी व सोबतीला भरपूर पर्जन्यमान होणार असल्याचा हवामान खात्याचा अंदाजामुळे पाऊस पडेलच, या भरोशावर बहुतांश शेतकऱ्यांनी खरीप पिकांच्या पेरण्या केल्या. मात्र, मागील एक महिन्यापासून मतदारसंघात पावसाने उघडीप दिल्यामुळे खरीप हंगाम धोक्यात येवून शेतकऱ्यांच्या चिंता वाढल्या होत्या.
दुसरीकडे धरण क्षेत्रात मात्र, समाधानकारक पाऊस होत असल्यामुळे सर्वच धरणांचा पाणीसाठा जवळपास ७५ टक्क्यांच्या आसपास पोहोचला असून नाशिकच्या धरणातून नांदूर मध्यमेश्वर बंधाऱ्यातून गोदावरी नदीमध्ये जायकवाडी धरणात जवळपास ३५ टीएमसी पाणी वाहून गेल्यामुळे आजमितीला जायकवाडी धरणाचा पाणीसाठा ८० टक्क्याच्या वर जावून पोहोचला आहे.
धरण क्षेत्रात असाच पाऊस सुरु राहिल्यास जुलै महिन्याच्या अखेर पर्यंतच जायकवाडी धरण १०० टक्के भरले जाणार असून अद्यापही ओव्हरफ्लोचे पाणी गोदावरी नदीत * सोडले जात आहे. याकडे आ. काळे यांनी जलसंपदा मंत्री विखे पाटील यांचे लक्ष वेधून त्यांच्यापुढे लाभ क्षेत्रातील परिस्थिती मांडून गोदावरी कालव्यांना ओव्हरफ्लोचे पाणी सोडण्याची मागणी केली होती. कालव्यांना पाणी सोडल्यास भूजलपातळी वाढण्यास मदत होवून शेतकऱ्यांच्या विहिरींना पाणी उपलब्ध होईल.
अडचणीच्या काळात हेच पाणी खरीप पिकांना देता येईल व शेतकऱ्यांना आपले खरीप पिक वाचविता येणार असल्याचे सांगितले होते. त्या मागणीवरून काल सोमवारपासून गोदावरी डाव्या कालव्याला ओव्हरफ्लोचे पाणी सोडण्यात आले आहे. त्याबद्दल आ. काळे यांनी शेतकऱ्यांच्या वतीने जलसंपदा मंत्री विखे पाटील यांचे आभार मानले आहे. सर्व पाणी पुरवठा करणारे साठवण तलाव पूर्ण क्षमतेने काळजीने भरून घ्यावेत, असे आवाहन आ. काळे यांनी केले असून उजव्या कालव्याला व पालखेड डाव्या कालव्याला देखील पाणी सोडणार असल्याचे त्यांनी सांगितले आहे.
