बॉलीवूडमध्ये अनेक चित्रपट बॉक्स ऑफिसवर चालतात तर काही फ्लॉप होतात. मात्र, एक चित्रपट असा आहे ज्यांचं आर्थिक वास्तव पाहिलं तर धक्का बसेल. ‘द लेडी किलर’ नावाचा हा चित्रपट अगदी मोठ्या आशेने आणि बड्या बॅनरखाली तयार झाला होता. मात्र, त्याचं जे झालं, त्याने अनेक निर्माते, कलाकार आणि प्रेक्षकांनाही एक खोल धडा दिला आहे.
‘द लेडी किलर’
साल 2023 मध्ये प्रदर्शित झालेला ‘द लेडी किलर’ हा अर्जुन कपूर आणि भूमी पेडणेकर यांचा थ्रिलर ड्रामा होता. दिग्दर्शक अजय बहल यांनी या चित्रपटासाठी कमालीची मेहनत घेतली होती आणि टी-सीरीजसारख्या दिग्गज निर्मितीसंस्थेने याला पाठिंबा दिला होता. प्रेक्षकांना एक रोमांचक अनुभव मिळावा, असा या सगळ्यांचा प्रयत्न होता. पण प्रत्यक्षात चित्रपटाच्या प्रदर्शनावेळी चित्र अगदी वेगळं उभं राहिलं. कुठे चुकलं, का चुकलं, हे शोधायच्या आधीच प्रेक्षकांनी याकडे पाठ फिरवली होती.
‘द लेडी किलर’साठी तब्बल 45 कोटी रुपयांचं बजेट खर्च करण्यात आलं होतं. पण जेव्हा तो चित्रपट थिएटरमध्ये दाखल झाला, तेव्हा पहिल्याच दिवशी केवळ 293 तिकिटं विकली गेली. हा आकडा ऐकून विश्वास बसणं कठीण होतं. संपूर्ण प्रदर्शना दरम्यान हा चित्रपट केवळ 60,000 रुपयांची कमाई करू शकला. म्हणजे जेमतेम 500 प्रेक्षकांनी हा चित्रपट पाहिला.
भारतातील नंबर 1 चा फ्लॉप चित्रपट
चित्रपटगृहांमध्ये फारशी दखल न मिळाल्यानंतर, निर्मात्यांनी ओटीटीचा रस्ता निवडला. सुरुवातीला नेटफ्लिक्सने हा चित्रपट खरेदी करण्याचा विचार केला होता, पण त्यानंतर त्यांनीही करार रद्द केला. हळूहळू सगळे ओटीटी प्लॅटफॉर्म्स दूर सरकले. शेवटी, या चित्रपटाला यूट्यूबवर मोफत प्रदर्शित करावं लागलं. एका मोठ्या व्यावसायिक चित्रपटासाठी ही बाब अत्यंत अपमानास्पद वाटावी, अशीच होती.
बॉलिवूडमध्ये यशस्वी चित्रपटांच्या मागे जशी मोठी यंत्रणा असते, तसंच अपयशामागेही अनेक पदरी गोष्टी असतात. कथा, सादरीकरण, संवाद, प्रमोशन किंवा कधी-कधी फक्त ‘टायमिंग’. पण ‘द लेडी किलर’चं अपयश हे इतकं पूर्ण आणि एकतर्फी होतं की, तो आज भारताच्या सर्वात मोठ्या फ्लॉप चित्रपटांच्या यादीत पहिल्या क्रमांकावर आहे. पैसा, स्टारडम, मार्केटिंग आणि बॅनर असूनही प्रेक्षकांच्या मनात स्थान निर्माण करता आलं नाही, हीच त्याची खरी शोकांतिका होती.
