अहिल्यानगर- पती-पत्नीमध्ये किरकोळ कारणावरून वाद झाला. त्यात वादातून पतीने स्वतः छातीत चाकूने वार करून घेत आत्महत्या केली. पत्नीनेही घराच्या पहिल्या मजल्यावरून उडी मारून आत्महत्येचा प्रयत्न केला. तिच्यावर जिल्हा रुग्णालयात उपचार सुरू आहेत. ही घटना एमआयडीसीजवळील गजानन कॉलनी येथे वडगाव गुप्ता रस्त्यावर गुरूवारी दि. १७रोजी रात्री घडली.
अनिल ध्रुव खरवाल (वय २६) असे मयताचे नाव असून, किरण अनिल खरवाल (रा. गजानन कॉलनी, वडगाव गुप्ता रोड, ता. जि. अहिल्यानगर मूळ रा. उत्तर प्रदेश) असे त्याच्या जखमी पत्नीचे नाव आहे.
दोघेही मूळचे उत्तर प्रदेशमधील राहणारे असून, सध्या गजानन कॉलनी येथे वास्तव्यास आहेत. गुरूवारी रात्री पती पत्नीमध्ये काहीतरी वाद झाला. त्यामुळे रागाच्या भरात अनिल याने स्वतः त्याच्या छातीवर चाकू मारून घेतला. त्यामुळे घटनास्थळी रक्ताचा थारोळा पाहून, त्यांच्या पत्नीने रुग्णवाहिका बोलवा, दवाखान्यात न्या, असा आरडा ओरडा केला. त्यानंतर तिने इमारतीच्या पहिल्या मजल्यावरून उडी मारली. त्यात ती जमिनीवर पडून जखमी झाली. हा आरडाओरडा ऐकून शेजारील नागरिकांनी धाव घेतली असता अनिल रक्ताच्या थारोळ्यात पडलेला दिसला तर त्याची पत्नी ही घराबाहेर पडलेली दिसली.
काही नागरिकांनी तातडीने रुग्णवाहिका बोलावून दोघांना उपचारासाठी शासकीय रुग्णालयात दाखल नेले. तेथील डॉक्टरांनी अनिल खरवाल याला तपासून तो औषधोपचारापूर्वी मयत झाला असल्याचे घोषित केले.
याप्रकरणी एमआयडीसी पोलीस ठाण्यात वैद्यकीय अधिकारी डॉ. कुलकर्णी यांच्या अहवालावरून आकस्मात मृत्यूची नोंद करण्यात आली आहे. तर किरण खरवाल हिचेवर जिल्हा रुग्णालयात उपचार सुरू आहेत. पोलिस हेडकॉन्स्टेबल जाधव गुन्ह्याचा तपास करीत आहेत.
