कोणताही महत्त्वाचा सरकारी किंवा वैयक्तिक व्यवहार करताना आपल्याला आधार कार्ड आणि पॅन कार्ड यांची गरज हमखास भासते. परंतु अनेक वेळा ही कागदपत्रं कुठे ठेवली, कधी काढली होती, याचा पत्ता लागत नाही आणि आपलं काम तसंच अर्धवट अडकून राहतं. अशा वेळी हतबलतेची भावना मनात दाटते. मात्र आता या समस्येवर सरकारने एक आधुनिक उपाय दिला आहे. WhatsApp च्या माध्यमातून काही सेकंदांतच तुमची आवश्यक कागदपत्रं पुन्हा मिळवण्याची सुविधा.
आजच्या डिजिटल युगात अनेक सरकारी सेवा आपल्या बोटांच्या टोकावर पोहोचल्या आहेत. त्याचाच एक भाग म्हणजे MyGov हेल्पडेस्क एक अधिकृत सरकारी WhatsApp सेवा, जी Digilocker मधील तुमची सर्व महत्वाची डॉक्युमेंट्स अगदी सहज मिळवून देते. जर तुमचं आधार कार्ड हरवलं असेल किंवा पॅन कार्ड अचानक सापडत नसेल, तर ही सेवा तुमच्यासाठी खूप उपयोगाची ठरू शकते. कोणत्याही अ‍ॅप्सची झंझट न करता, फक्त WhatsApp वर एक साधा “Hi” पाठवला की ही सेवा तात्काळ सुरू होते.
WhatsApp वरील सेवा
तुमच्या मोबाईलमध्ये 9013151515 हा नंबर सेव्ह करून, WhatsApp वरून त्यावर “Hi” असा मेसेज पाठवा. लगेच MyGov हेल्पडेस्क कडून रिप्लाय येईल आणि Digilocker सेवा सुरू करण्याचा पर्याय दिला जाईल. जर आधीच तुमचं Digilocker वर खाते असेल, तर OTP पडताळणी केल्यानंतर काही क्षणातच तुमची सगळी सेव्ह केलेली कागदपत्रं तुम्हाला दिसू लागतील. यामध्ये आधार, पॅन, ड्रायव्हिंग लायसन्ससह अनेक सरकारी प्रमाणपत्रं असू शकतात.
काही जणांचं Digilocker खाते नसेल, तरी काळजी करण्यास काहीच कारण नाही. WhatsApp वरूनच नवीन खाते तयार करता येतं आणि त्यासाठी फक्त आधार क्रमांक आणि मोबाईल नंबर पुरेसा असतो. ही प्रोसेस फारच सोपी असून अगदी काही मिनिटांमध्ये पूर्ण होते. एकदा खातं तयार झालं की, तुमचं डॉक्युमेंट्स WhatsApp वरच डाउनलोड करता येतं.
नवीन सेवेचे फायदे
या सेवेचा सर्वात मोठा फायदा म्हणजे कोणतंही डॉक्युमेंट हरवलं तरी घाईघाईने झेरॉक्स सेंटरच्या शोधात पळापळ करायची गरज राहत नाही. शाळा, कॉलेज, बँक, किंवा सरकारी कार्यालयात काही कामासाठी अचानक ओळखपत्राची गरज भासली तरी, फक्त तुमच्या मोबाईलमध्ये WhatsApp असणं पुरेसं आहे.
सरकारने दिलेली ही डिजिटल सुविधा आता फक्त सुविधा न राहता, आपलं वेळ आणि श्रम वाचवणारा साथीदार बनत आहे. त्यामुळे पुढच्या वेळी तुमचं आधार किंवा पॅन कार्ड दिसेनासं झालं, तर घाबरू नका… फक्त WhatsApp वर एक “Hi” पाठवा आणि तुमचं काम वेळेवर, सहज पूर्ण करा.
