आजच्या घडीला जेव्हा एखादी व्यक्ती घरबसल्या लाखो लोकांशी संवाद साधते, तेव्हा त्या संवादातून केवळ लोकप्रियता नाही तर आर्थिक यशही मिळवता येते, हे युट्यूबसारख्या प्लॅटफॉर्ममुळे सिद्ध झालं आहे. विशेषतः भारतीय महिला युट्यूबर्सनी या क्षेत्रात जो ठसा उमटवला आहे, तो केवळ कौतुकास्पद नाही, तर अनेक तरुणींसाठी प्रेरणादायीही आहे. त्यांच्या कथांमध्ये फक्त यश नाही, तर मेहनत, चिकाटी आणि नव्या वाटा शोधण्याची हिंमतही आहे.
श्रुती अर्जुन आनंद
श्रुती अर्जुन आनंद हिचं नाव घेतलं की, सौंदर्य, स्टाईल आणि कौटुंबिक मजा यांचा संगम आठवतो. 2010 मध्ये तिने एक छोटं युट्यूब चॅनल सुरू केलं आणि आज तिच्याकडे 1.2 कोटी सबस्क्राइबर्स आहेत. मेकअप टिप्स, ब्युटी ट्युटोरियल्स, आणि हलकंफुलकं कौटुंबिक कंटेंट यामुळे ती लोकप्रिय झाली. तिची अंदाजे संपत्ती 45 कोटी रुपयांच्या आसपास आहे आणि तिच्या सातत्यपूर्ण प्रयत्नांनी ती देशभरात ओळखली जाते.
निशा मधुलिका
याच यादीत दुसरं नाव येतं ते म्हणजे निशा मधुलिकाचं. 2011 मध्ये सुरु झालेला तिचा पाककृतींवर आधारित चॅनल लाखो भारतीय स्वयंपाकप्रेमींना मार्गदर्शन करत आला आहे. शुद्ध शाकाहारी पदार्थांची चव तिने तिच्या साध्या भाषेत सांगितली आणि त्यासाठी तिच्या चॅनलला 1.47 कोटी सबस्क्राइबर्स मिळाले. तिची एकूण संपत्ती 43 कोटी रुपये असून, ती आज अनेक घरांमध्ये स्वयंपाकघरातील एक विश्वासार्ह मार्गदर्शक म्हणून ओळखली जाते.
कोमल पांडे
फॅशन आणि स्टाईलच्या दुनियेत कोमल पांडेने स्वतःची एक वेगळी जागा निर्माण केली आहे. 2017 मध्ये तिने तिचा युट्यूब प्रवास सुरू केला आणि तिच्या हटके फॅशन व्हिडिओंनी तरुणांमध्ये विशेष लोकप्रियता मिळवली. तिचं व्यक्तिमत्त्व जितकं ठसकेबाज, तितकंच तिचं कंटेंटही ताजं वाटतं. तिची एकूण संपत्ती सुमारे 30 कोटी रुपये आहे.
प्राजक्ता कोळी
प्राजक्ता कोळी, जी ‘मोस्टलीसेन’ या नावाने सोशल मीडियावर ओळखली जाते, ही युट्यूबच्या पलीकडे जाऊन बॉलीवूडमध्येही झळकली आहे. 2015 मध्ये तिचं चॅनल सुरू झालं आणि विनोदी व खुमासदार व्हिडिओंनी ती लाखो लोकांची लाडकी बनली. आज तिच्याकडे 72 लाख सबस्क्राइबर्स आहेत आणि ती सुमारे 16 कोटी रुपयांची संपत्ती कमावते.
अनिशा दीक्षित
शेवटचं नाव म्हणजे अनिशा दीक्षित. ती आपल्या उत्साही, मजेशीर आणि महिलांशी संबंधित विषयांवर व्हिडिओ तयार करते. तिच्या विनोदात वास्तवाचा हलकाफुलका स्पर्श असतो. तिची एकूण संपत्ती अंदाजे 15 ते 20 कोटी रुपये असून, तिचा युट्यूब कंटेंट महिलांच्या रोजच्या अनुभवांना हसत खेळत मांडतो.
