जेऊर- बंद घराच्या दरवाजाचे कुलूप उघडून अज्ञात चोरट्याने घरातील सोन्याचे दागिने रोख रक्कम असा सुमारे १० लाख रुपये किमतीचा ऐवज चोरुन नेला. ही घटना नगर तालुक्यातील बहिरवाडी येथे १८ जुलै ते २३जुलै दरम्यान घडली.
याबाबत एमआयडीसी पोलीस ठाण्यात नंदू बलभीम दारकुंडे (वय ४९, रा. बहिरवाडी, ता.नगर) यांनी फिर्याद दिली आहे. फिर्यादी हे औषधोउपचाराकरिता कोल्हापूर येथे १८ जुलै रोजी गेले होते. त्यांच्या घरी त्यांची आई व आजी या दोघी होत्या. फिर्यादी यांची आई व आजी घरातील काम उरकून घराला कुलूप लावून घराची चावी घराजवळच असलेल्या त्यांच्या नेहमीच्या ठिकाणी ठेवून शेतात गेल्या.
तिथून परत आल्यानंतर फिर्यादी यांच्या आईने दरवाजा उघडण्याकरिता चावी घेतली असता ती चावी थोडी वाकडी झालेली त्यांच्या निदर्शनास आली. त्यावर त्यांनी घराचे कुलूप उघडून आत प्रवेश केला असता घरातील सर्व साहित्य व्यवस्थित ठेवलेले दिसून आले. फिर्यादी हे कोल्हापूर येथून परत आल्यानंतर कपाटात पैसे ठेवण्याकरता गेले असता त्यांनी कपाट उघडून पाहिले असता आतील सर्व साहित्य व्यवस्थित ठेवलेले दिसून आले.
परंतु त्यांनी ठेवलेले पैसे त्यांना दिसून आले नाही त्यावर त्यांनी घरात सगळ्याकडे चौकशी केली असता त्याबाबत कोणाला काही माहित नसल्याचे सर्वांनी सांगितले. फिर्यादी यांनी कपाटाची पाहणी केली असता त्यांना आतील सोन्याच्या दागिण्याचे बॉक्स मोकळे असलेले दिसून आले.
त्यांनी कपाटातील सर्व बॉक्सची पाहणी केली असता बॉक्समधील ५ तोळे ५ ग्रॅम वजनाचे चेन चे मंगळसूत्र, २२.६ ग्रॅम वजनाचे नेकलेस व ४ लाख ५० हजार रुपयांची रोख रक्कम दिसून आली नाही. यावरुन घरात चोरी झाल्याचे त्यांच्या निदर्शनास आले.
घराच्या दरवाजाला कुलूप लावल्यानंतर चावी ठेवलेल्या ठिकाणावरुन कोणीतरी माहितगार व्यक्तीने तिथून चावी घेऊन घराचे कुलूप उघडून आतील कपाटातील बॉक्समधील दागिने व रोख रक्कम चोरून घेऊन सर्व साहित्य जसेच्या तसे व्यवस्थित ठेवून चोरी केली असल्याची त्यांची खात्री झाली. याप्रकरणी एमआयडीसी पोलीस ठाण्यात नंदू दारकुंडे यांनी दिलेल्या फिर्यादीवरुन घरफोडीचा चोरीचा गुन्हा दाखल केला असून पुढील तपास पोलीस उपनिरीक्षक मोंढे हे करीत आहेत.
