फेंगशुईनुसार बनवा घरातील किचन, कायम बरसेल धन-सुखाची कृपा!

स्वयंपाकघर हे घराच्या हृदयासारखे असते. जिथे फक्त जेवण तयार होत नाही, तर कुटुंबाच्या आनंदाचं, प्रेमाचं आणि एकतेचं उगमस्थानही असतं. त्यामुळे ही जागा बांधताना किंवा त्यामध्ये बदल करताना प्रत्येक गोष्ट विचारपूर्वक केली गेली पाहिजे. अनेकजण स्वयंपाकघराचं महत्त्व फक्त अन्नाशी जोडतात, पण फेंगशुई शास्त्रानुसार याचा थेट परिणाम घरातल्या सुख-शांतीवर होतो. चुकीच्या रचनेमुळे घरात तणाव, वाद किंवा आर्थिक अडचणी देखील वाढू शकतात. म्हणूनच स्वयंपाकघर बांधताना काही मूलभूत गोष्टींची काळजी घेणं गरजेचं आहे.

स्वयंपाकघराचं स्थान

सर्वात आधी, स्वयंपाकघराचं स्थान म्हणजे त्याची दिशा आणि जागा अत्यंत महत्त्वाची असते. फेंगशुईप्रमाणे स्वयंपाकघर कधीही मुख्य दरवाजाच्या थेट समोर नसावं. यामुळे घरात प्रवेश करणारी ऊर्जा थेट किचनमध्ये जाते, जी आरोग्य आणि समृद्धीसाठी हानिकारक ठरू शकते. तसंच, स्वयंपाकघर बेडरूमजवळ असणं देखील टाळावं, कारण त्यामुळे घरात तणाव आणि असमाधान वाढण्याची शक्यता असते. आग्नेय दिशा ही स्वयंपाकासाठी सर्वात अनुकूल मानली जाते, कारण ही दिशा अग्नीच्या तत्त्वाशी संबंधित आहे.

रंगसंगती

रंगसंगतीचाही मोठा प्रभाव असतो. अनेकजण किचनमध्ये काळ्या रंगाचा आकर्षक वापर करतात, पण फेंगशुईनुसार हा रंग नकारात्मक ऊर्जा निर्माण करतो. त्याऐवजी हलका हिरवा, पांढरा किंवा क्रीम रंग वापरल्यास किचनमध्ये प्रसन्नता निर्माण होते आणि अन्नात चांगली ऊर्जा मिसळते. रंग आपल्या मनोवृत्तीवर आणि घरातील वातावरणावर मोठा परिणाम करतात.

स्टोव्ह आणि सिंकचं नियोजन

किचनमधील स्टोव्ह आणि सिंक यांचं योग्य नियोजन देखील महत्त्वाचं आहे. हे दोन्ही अग्नी आणि जल या परस्परविरोधी तत्त्वांचं प्रतिनिधित्व करतात, त्यामुळे त्यांचं एकमेकांपासून योग्य अंतरावर असणं आवश्यक आहे. कमीत कमी 3 फूटाचं अंतर ठेवलं, तर नातेसंबंधांमध्ये समजूत आणि संवाद टिकतो. दोघांमधील टोकाचं अंतर किंवा खूप जवळीक यामुळे घरात वादाचे प्रसंग उद्भवू शकतात.

स्वच्छता

स्वयंपाकघर स्वच्छ आणि नीटनेटके ठेवणं हा नियम केवळ आरोग्यासाठीच नाही, तर सकारात्मक उर्जेसाठी देखील आवश्यक आहे. घाणेरडे, अस्ताव्यस्त आणि तुटक्या भांड्यांनी भरलेलं किचन हे नकारात्मकतेचं केंद्र बनतं. त्यामुळे अशा गोष्टी ताबडतोब काढून टाकाव्यात आणि किचन नेहमी टापटीप ठेवावं.

गॅसची दिशा

चुलीच्या दिशेकडे दुर्लक्ष करणं देखील चूक ठरू शकतं. स्वयंपाक करताना चेहरा पूर्वेकडे किंवा आग्नेय दिशेला असेल, तर ते आरोग्यास अनुकूल ठरतं आणि घरात लक्ष्मीचा वास राहतो.