भारतीय पर्यटकांना थायलंडचा मोह टाळता येत नाही, आणि त्यामागचं खरं कारण फक्त सौंदर्य नव्हे, तर एक भावनिक आणि अनुभवात्मक जोड आहे. प्रत्येक वर्षी हजारोंच्या संख्येने भारतीय थायलंडला भेट देतात, आणि बहुतेकांना एकदा नव्हे तर वारंवार तिथं जाऊ वाटतं. थायलंडचं वातावरण, लोकांची आपुलकी, आणि खर्चिक न वाटणारा अनुभव हे सगळं एकत्र आल्यावर भारतीय मनाला भुरळ घालणं स्वाभाविकच आहे.
व्हिसा लवकर मिळतो
थायलंडचा व्हिसा मिळवणं ही प्रक्रिया अत्यंत सोपी आहे, आणि भारतीयांसाठी तर ही एक मोठी सोय आहे. विमानतळावर पोहोचताच 15 ते 30 दिवसांचा व्हिसा सहज मिळतो, आणि ई-व्हिसामुळे तर ही प्रक्रिया आणखीच सोयीची झाली आहे. त्यामुळे अचानक सुट्टी मिळाली, तरी थायलंडच्या ट्रिपचं प्लॅनिंग अडत नाही.
तिकीटांचे माफक दर
याशिवाय, आर्थिकदृष्ट्या देखील थायलंड एक अत्यंत किफायतशीर पर्याय ठरतो. भारतातून थायलंडला जाणाऱ्या विमानांची तिकिटं काही वेळा फक्त 4,000 रुपयांपासून सुरू होतात. तिथले हॉटेल्स, गेस्टहाउस, आणि स्थानिक स्ट्रीट फूड इतके स्वस्त असतात की बजेटमध्येही आरामशीर आणि मजेशीर सुट्टी घालवता येते. जर ऑफ-सीझनमध्ये प्रवास केला, तर संपूर्ण ट्रीप अगदी अल्पखर्चात उरकता येते.
आकर्षक नाईटलाइफ
थायलंडचं नाईटलाइफ हे देखील भारतीय तरुणांना खूप भुरळ घालणारं आहे. बँकॉकमधील झगमगाटी रस्ते, क्लब्स आणि नाईट मार्केट्समध्ये एक वेगळीच उर्जा असते. रात्रीही हे शहर झोपत नाही, आणि तिथला अनुभव प्रत्येकासाठी नवीन काहीतरी देऊन जातो. अनेक भारतीय पर्यटकांना इथल्या मुक्त, मजेशीर आणि आकर्षक वातावरणाची सवयच लागते.
पर्यटन स्थळे
निसर्गप्रेमींना थायलंड म्हणजे एक स्वर्ग आहे. फुकेत, क्राबी, पत्ताया आणि जेम्स बाँड बेटांसारख्या ठिकाणी समुद्राच्या निळसर लाटांमध्ये मन हरवून जातं. स्कूबा डायव्हिंग, पॅरासेलिंग, किंवा अगदी सायकल ट्रेल्स असे गेम्स आणि निसर्ग दोघांचाही अतुलनीय संगम येथे अनुभवता येतो.
थायलंडची धार्मिक आणि सांस्कृतिक बाजूही भारतीयांना भावते. येथे असलेल्या भव्य बौद्ध मंदिरांमध्ये एक शांतता आणि दिव्यता असते जी भारतीयांच्या श्रद्धेला हात घालते. अनेक थाई परंपरा, त्यांच्या नृत्यकला, आणि धार्मिक रीतिरिवाज भारतीय संस्कृतीशी थोड्याफार प्रमाणात साम्य साधतात.
थायलंडमधील लोकांचा स्वभाव
या सगळ्या गोष्टींसोबतच थायलंडमधील लोकांचा स्वभाव हे देखील एक महत्त्वाचं कारण आहे. “स्मितांची भूमी” म्हणून ओळखल्या जाणाऱ्या या देशात भारतीयांना आपल्यासारखंच वाटतं. लोकांचे हास्य, त्यांची मदतीची वृत्ती आणि अन्नपदार्थांमध्ये भारतीय चवांची झलक हे सर्व मिळून थायलंड भारतीय पर्यटकांसाठी एक अतूट आकर्षण बनून राहतं.
