टी-20 या क्रिकेट फॉरमॅटमध्ये काही फलंदाजांनी सर्वात जलद धावा करत, इतिहासात आपले नाव कोरले. विशेष म्हणजे, टी-20 आंतरराष्ट्रीय सामन्यांमध्ये सर्वात लवकर 2,000 धावा पूर्ण करणाऱ्या खेळाडूंच्या यादीवर भारत आणि पाकिस्तानचा दबदबा स्पष्ट दिसून येतो. या यादीतील खेळाडूंनी केवळ धावा केल्या नाहीत, तर संपूर्ण जगाच्या नजरा आपल्या खेळाकडे वळवल्या.
बाबर आझम
या यादीची सुरुवात होते पाकिस्तानच्या बाबर आझमने, जो आपल्या संयमी फलंदाजी आणि तंत्रशुद्धतेसाठी ओळखला जातो. बाबरने अवघ्या 52 डावांमध्ये 2,000 धावांचा टप्पा गाठला आणि त्याचा हा पराक्रम पाकिस्तानसाठी अभिमानास्पद ठरला. त्याच्या फलंदाजीची स्थिरता आणि अचूकता ही टी-20 फॉरमॅटमध्येही तितकीच प्रभावी ठरली आहे.
मोहम्मद रिझवान
दुसऱ्या क्रमांकावर येतो मोहम्मद रिझवान, ज्याने देखील 52 डावांतच ही कामगिरी पूर्ण केली. 2022 मध्ये इंग्लंडविरुद्ध त्याच्या फलंदाजीतून ती चमक दिसून आली होती. रिझवानच्या खेळात एक प्रकारचा आत्मविश्वास आणि सामर्थ्य आहे, ज्यामुळे तो पाकिस्तानसाठी निर्णायक क्षणी फलंदाजी करू शकतो.
मुहम्मद वसीम
तिसऱ्या स्थानावर आहे यूएईचा कर्णधार मुहम्मद वसीम. नामिबियाविरुद्धच्या सामन्यात त्याने 54 डावांमध्ये 2,000 धावांचा टप्पा पार केला. छोट्या संघातून येऊन अशा पातळीवर पोहोचणं हे निश्चितच प्रेरणादायी आहे. त्याच्या या कामगिरीने जागतिक क्रिकेटमध्ये यूएईचा झेंडा उंचावला.
विराट कोहली आणि सूर्यकुमार यादव
भारतातील क्रिकेट चाहत्यांसाठी यादीत दोन मोठी नावं आहेत. विराट कोहली आणि सूर्यकुमार यादव. विराटने आपल्या क्लासिक फलंदाजीतून 56 डावांत 2,000 धावा पूर्ण केल्या होत्या. आता तो टी-20 आंतरराष्ट्रीय क्रिकेटमधून निवृत्त झाला असला तरी त्याचा प्रभाव अजूनही तसाच आहे. त्याच्याच पावलांवर चालत सूर्यकुमार यादवनेदेखील 56 डावांमध्ये हीच कामगिरी केली.
