शिर्डी- केंद्र शासनाच्या ‘नक्शा’ प्रकल्पांतर्गत शिर्डी नगरपरिषद हद्दीत ड्रोनद्वारे मिळकतींचे हवाई सर्वेक्षण सुरू झाले असून, प्रत्येक मिळकतीचे अचूक नकाशीकरण आणि माहिती संकलनाची प्रक्रिया सध्या प्रगतीपथावर आहे.
नागरिकांनी आपल्या मालकीच्या जमिनीची अधिकृत कागदपत्रे जसे की सातबारा उतारा, खरेदीखत, मिळकत पत्रिका आदी सादर करून या प्रकल्पाला सहकार्य करावे, असे आवाहन राहाता भूमी अभिलेख विभागाचे उपअधीक्षक योगेश थोरात यांनी केले आहे.
‘नक्शा’ प्रकल्प केंद्र शासनाच्या ग्रामीण विकास मंत्रालयाच्या भू-संसाधन विभागामार्फत देशभरातील १५२ शहरांमध्ये प्रायोगिक तत्वावर राबवण्यात येत आहे. महाराष्ट्रातील दहा नगरपालिकांमध्ये या उपक्रमाची अंमलबजावणी सुरू असून शिर्डी नगरपरिषद त्यापैकी एक आहे.
शहरातील मिळकतींचे ड्रोन तंत्रज्ञानाच्या साहाय्याने हवाई सर्वेक्षण केले जात असून, त्यानंतर प्रत्यक्ष ठिकाणी जाऊन मिळकतींची पडताळणी केली जाणार आहे. प्रकल्पाची तांत्रिक भागीदार संस्था सर्वे ऑफ इंडिया असून, आधुनिक जीआयएस प्रणालीच्या साहाय्याने मिळकतींचे सर्व तपशील अद्ययावत व शास्त्रशुद्ध स्वरूपात भूअभिलेखांमध्ये नोंदवले जाणार आहेत.
या प्रकल्पामुळे भूमालकीबाबत स्पष्टता निर्माण होईल, भूविकास प्रक्रियेत पारदर्शकता वाढेल आणि अनधिकृत बांधकामांवर नियंत्रण ठेवता येईल. कर आकारणी अधिक अचूक होईल, मालमत्ता व्यवहार सुलभ होतील आणि शहर नियोजन अधिक परिणामकारकपणे करता येईल.
शिर्डीसह पंढरपूर, बारामती, कुळगाव-बदलापूर, वरणगाव, कन्नड, बुलढाणा, घुग्घुस, खोपोली आणि मुत्तीजापूर या दहा नगरपालिकांमध्ये ‘नक्शा’ प्रकल्पाचा पथदर्शी प्रयोग सुरू आहे.
शिर्डी नगरपरिषद आणि भूमी अभिलेख विभाग यांचे संयुक्त प्रयत्न या प्रकल्पाच्या अंमलबजावणीसाठी चालू असून, नागरिकांनी आवश्यक ती कागदपत्रे वेळेत सादर करून सहकार्य करावे, असे आवाहन उपअधीक्षक योगेश थोरात यांनी पुन्हा एकदा केले.
